Bugun Hindistonning bir necha hududlarida kuchli yog‘ingarchilik oqibatida maktablar vaqtinchaga yopildi.
Hindistonning Chhattisgarh shtatidagi Raipur shahrida kuchli yog‘ingarchilik xavfi sababli joriy yil 29-oktyabr kuni maktab va kollejlar yopildi. “Arnab” sikloni ta’sirida shtatda kuchli yomg‘ir va shamol kuzatilishi kutilayotgani ma’lum qilindi.
Shtatning 12 ta tumanida ob-havo xavfi yuzasidan ogohlantirish e’lon qilingan. Mahalliy ma’muriyatlar suv toshqini, chaqmoq chaqishi, inshootlarning shikastlanishi va elektr ta’minotidagi uzilishlar ehtimoliga qarshi choralar ko‘rilgan.
Shu bilan birga, Ranchi, G‘arbiy Singhbhum, Sharqiy Singhbhum va Simdega tumanlari ma’muriyatlari maktablarda 28-29-oktyabr kunlari darslar to‘xtatilishini e’lon qilgan.
The times of India nashrining yozishicha, ta’lim muassasalarini yopish Hindiston meteorologiya departamentining yomg‘ir, momaqaldiroq, chaqmoq chaqishi va kuchli shamol davom etishi haqidagi ogohlantirishi ortidan ehtiyot chorasi sifatida belgilangan.
Hindiston maktab ta’limi vaziri Gajendra Yadav ob-havo sharoiti sababli xavf ostida qolishi mumkin bo‘lgan tumanlarda o‘quvchilar xavfsizligini ta’minlash maqsadida ikki kunlik ta’til e’lon qilishni tavsiya qilgan.
Bugun, 29-oktyabrda Raipur shahri qalin bulutlar bilan qoplangan. Shahar va shtatning boshqa hududlarida vaqti-vaqti bilan yomg‘ir yog‘ib, salqin va kuchli shamollar kuzatilgan. “Arnab” sikloni Andhra-Pradesh shtati sohillaridan o‘tganidan so‘ng mamlakat ichkarisiga siljigan.
Mahalliy OAV xabarlariga ko‘ra, siklon quruqlikka yetib kelganida shamolning doimiy tezligi soatiga 125–135 kilometrni tashkil etgan, ayrim paytlarda esa 150 kilometrgacha yetgan.
“Arnab” sikloni – 2026-yil oktabr oyi oxirida Hindiston okeanining shimoliy qismida (Bengal qoʻltigʻida) hosil boʻlgan va Hindistonning sharqiy sohillariga yopirilgan kuchli tropik siklondir. “Arnab” nomi Bangladesh tomonidan taklif etilgan boʻlib, bengal tilida “okean” yoki “dengiz” degan maʼnoni anglatadi.
Qayd etilishicha, kuchli yog‘ingarchilik xavfi Chhattisgarh shtatining shimoliy va markaziy hududlariga siljishi kutilmoqda. Hindiston meteorologiya departamenti ayrim joylarda kuchli va juda kuchli yomg‘ir yog‘ishi, momaqaldiroq, chaqmoq chaqishi hamda kuchli shamol kuzatilishi mumkinligini prognoz qilgan. Xavfli hududlarda shamol tezligi soatiga 60–80 kilometrga yetishi, ayrim joylarda esa yanada kuchli shamol esishi mumkin.
Shtat janubidagi Bastar, Bijapur, Dantewada, Kondagaon va Sukma tumanlari kuchaytirilgan ob-havo ogohlantirishi e’lon qilingan hududlar qatoriga kiritilgan. Gariaband, Raigarh va boshqa tumanlarda ham yomg‘ir kuzatilgan. Bir qator hududlarda havo harorati pasaygan. Prognozlarga ko‘ra, noqulay ob-havo siklonning dastlabki ta’siri kuzatilgan hududlardan tashqariga ham tarqalishi mumkin.
Raipur tumani ma’muriyati politsiya, sog‘liqni saqlash, daromadlar boshqarmasi, mahalliy boshqaruv organlari hamda elektr ta’minoti idoralariga ob-havo bilan bog‘liq favqulodda vaziyatlarga tayyor turish bo‘yicha ko‘rsatma bergan. Favqulodda vaziyatlarga javob beruvchi guruhlar va yong‘in xavfsizligi xizmatlari shay holatga keltirilgan.
Shuningdek, mas’ullarga pastqam hududlar, drenaj tizimlari, xavfli inshootlar va elektr uzatish liniyalarini nazorat qilish topshirilgan.
Aholiga yordam ko‘rsatish va ob-havo bo‘yicha ogohlantirishlarni kuzatib borish uchun tezkor shtab tashkil etilgan. Fuqarolarga zaruratsiz safarlardan tiyilish, suv bosgan yo‘llar va soylardan uzoq turish, chaqmoq chaqishi va kuchli shamol vaqtida bino ichida qolish tavsiya etilgan.
Hindiston meteorologiya departamenti 29-oktyabr kuni ham Chhattisgarh shtatining bir qator hududlarida beqaror ob-havo saqlanib qolishini prognoz qilmoqda.
Shuningdek, yomg‘ir va momaqaldiroqli jala davom etishi kutilmoqda. Shimoliy va markaziy tumanlarning ayrim joylarida kuchli va juda kuchli yog‘ingarchilik ehtimoli saqlanib qoladi. Momaqaldiroq va kuchli shamol esa rasmiylar tomonidan asosiy xavf omillari sifatida qayd etilgan.
Avvalroq, Istanbulda kuchli yomg‘ir oqibatida maktablarda darslar bekor qilinib, tirbandlik 89 foizga yetgani haqida xabar berilgandi.
