Endi xususiy ta’lim tashkilotlariga dastlabki 5 yilida binolardan ijara asosida foydalanishga ruxsat berilishi mumkin

Muhokamalar portaliga Hukumatning “Respublikada nodavlat ta’lim xizmatlarining sifatini oshirish chora-tadbirlari to‘g‘risida”gi qaror loyihasi muhokamaga qo’yildi.

Avvalroq, ushbu loyiha doirasida nodavlat ta’lim tashkilotlari qabul jarayonini bir yilda ikki marotaba – 15-oktyabrgacha hamda 15-fevralgacha amalga oshirishni taklif qilingani haqida xabar bergan edik.

Bundan tashqari, Vazirlik hamda “Ta’lim sohasidagi loyihalar markazi” loyiha ofisining nodavlat ta’lim xizmatlarini ko‘rsatish sohasida ta’lim sifatini oshirish va o‘quv jarayonini samarali tashkil etish hamda ta’lim integratsiyasini to‘liq ta’minlashga qaratilgan quyidagi takliflari ma’qullanishi taklif etilmoqda.

a) ta’lim shaklidan qat’i nazar, talabgorga mulk huquqi asosida tegishli bo‘lgan o‘quv binolari, talabalar turar joyi va o‘quv jarayonini tashkil etish bilan bog‘liq boshqa bino va inshootlarning mavjud bo‘lishi. Bunda nodavlat ta’lim tashkilotiga faoliyatining dastlabki 5 yilida bino va inshootlardan ijara huquqi asosida foydalanishga ruxsat beriladi;

b) nodavlat ta’lim tashkilotining nomi va kelgusi besh yillik strategik rejasi yuzasidan Vazirlikning ijobiy xulosasi mavjud bo‘lishi. Bunda besh yillik strategik rejada, jumladan nodavlat ta’lim tashkilotini rivojlantirish dasturi, ta’lim sifatini ta’minlash tizimi, to‘lov-kontrakt miqdori va boshqa muhim mezonlar ko‘rsatiladi;

v) qabul parametrlarini Vazirlik bilan kelishish hamda qabul jarayonini bir yilda ikki marotaba– 15-oktyabrgacha hamda 15-fevralgacha amalga oshirish;

abituriyentlarni o‘qishga qabul qilish, o‘qishini ko‘chirish va bitiruvchilarni yakuniy davlat attestatsiyasidan o‘tkazishni davlat ta’lim tashkilotlariga belgilangan talablar asosida amalga oshirish;

g) nodavlat ta’lim tashkilotlaridao‘quv, ilmiy va ma’muriy jarayonlarni boshqaruvchi hamda ta’lim sifatini nazorat qiluvchi axborot tizimining mavjud bo‘lishi. Bunda nodavlat ta’lim tashkiloti o‘z axborot tizimini Vazirlikning ta’lim jarayonlarini boshqarish axborot tizimlariga integratsiya qilishi shartligi belgilanadi;

Loyihada shuningdek, amaldagi litsenziya asosida ta’lim xizmatlarini ko‘rsatib kelayotgan nodavlat ta’lim tashkilotlari ushbu qo‘shimcha litsenziya talabi kuchga kirgan vaqtdan boshlab 5 yil ichida mulk huquqi asosida zarur bino va inshootlarga ega bo‘lishi talab etiladi.

Bunda mazkur talab O‘zbekiston Respublikasi Prezidenti qarorlari asosida faoliyati tashkil etilgan ta’lim tashkilotlariga nisbatan tatbiq etilmaydi;

Oliy ta’lim jarayonlarini boshqarish axborot tizimiga (HEMIS) kiritilmagan va registratsiyadan o‘tkazilmagan ta’lim oluvchilarga o‘qish yakuni bo‘yicha davlat namunasidagi tegishli hujjat berilishiga yo‘l qo‘yilmaydi.

Adliya vazirligi Raqamli texnologiyalar vazirligi, Vazirlik bilan birgalikda ikki hafta muddatda “Litsenziya” axborot tizimida ishlash tartibini mazkur qaror talablari asosida qayta ko‘rib chiqilishi ko‘zda tutilgan.

Vazirlik:

a) ikki oy muddatda:

– nodavlat oliy ta’lim tashkilotlari bitiruvchilarini yakuniy davlat attestatsiyasidan o‘tkazish hamda bitiruvchilarga diplom berishning yagona tartibini ishlab chiqilishini ta’minlash;

– nodavlat ta’lim tashkilotlari to‘g‘risidagi ma’lumotlarni masofadan boshqarish va tahlil qilish bo‘yicha elektron platformani shakllantirsin, bunda ushbu tashkilotlar tomonidan litsenziya talablariga amal qilish, o‘quv jarayoni va ta’lim sifati holatini muntazam monitoring qilib borish imkoniyati to‘liq yaratilishini nazarda tutilishi;

– “Ta’lim sohasidagi loyihalar markazi” loyiha ofisi bilan birgalikda oliy ta’lim tashkilotlarida sirtqi ta’lim shakliga qabul amalga oshirilmaydigan ta’lim yo‘nalishlari ro‘yxatini kengaytirish bo‘yicha ilg‘or xorij tajribasi asosida asoslantirilgan takliflarni Vazirlar Mahkamasiga kiritilishi belgilangan.

b) uch oy muddatda:

– nodavlat ta’lim tashkilotlari tomonidan litsenziya talablari va shartlari buzilganda moliyaviy sanksiya shaklidagi jarimalarni qo‘llash masalasi bo‘yicha Vazirlar Mahkamasiga taklif kiritish;

– nodavlat o‘rta maxsus, kasbiy, oliy ta’lim hamda oliy ta’limdan keyingi ta’lim xizmatlarini ko‘rsatish faoliyati uchun litsenziyalash bo‘yicha amaldagi tartiblar o‘zgarishi munosabati bilan qonunchilik hujjatlariga o‘zgartirish va qo‘shimchalar kiritish bo‘yicha normativ-huquqiy hujjat loyihasini ishlab chiqish va Vazirlar Mahkamasiga kiritish;

v) 6 oy muddatda nodavlat ta’lim tashkilotlarining o‘z namunasidagi ta’lim to‘g‘risida hujjat (diplom)ga qo‘yiladigan yagona talablarni ishlab chiqilishi va belgilangan tartibda tasdiqlanishi keltirilgan.

1-ilova

Nodavlat o‘rta maxsus, kasbiy, oliy hamda oliy ta’limdan keyingi ta’lim tashkilotlarini faoliyati uchun litsenziya talab va shartlari

Litsenziya nomi:

nodavlat o‘rta maxsus ta’lim xizmatlarini ko‘rsatish faoliyati uchun litsenziya;

nodavlat kasbiy ta’lim xizmatlarini ko‘rsatish faoliyati uchun litsenziya;

nodavlat oliy ta’lim xizmatlarini ko‘rsatish faoliyati uchun litsenziya;

nodavlat oliy ta’limdan keyingi ta’lim xizmatlarini ko‘rsatish faoliyati uchun litsenziya.

Litsenziyalanadigan faoliyatning kichik turlari:

a) o‘rta maxsus ta’lim xizmatlari;

b) kasbiy ta’lim xizmatlari;

v) oliy ta’lim xizmatlari;

g) oliy ta’limdan keyingi ta’lim xizmatlari.

Ariza beruvchilar toifasi:

Yuridik shaxs

Litsenziyalovchi organ:

Oliy ta’lim, fan va innovatsiyalar vazirligi

Litsenziyani olish uchun taqdim qilinadigan hujjatlar:

a) ariza;

arizada quyidagilar ko‘rsatiladi:

yuridik shaxsning nomi va tashkiliy-huquqiy shakli, pochta manzili, elektron pochtasi, ta’lim faoliyatini amalga oshirish manzili, bank muassasasining nomi va bank hisobvarag‘i, soliq to‘lovchining identifikatsiya raqami (STIR), faoliyatning litsenziyalanayotgan turi, ariza to‘ldirish sababi (yangi litsenziya olish, o‘zgartirish, qayta rasmiylashtirish), litsenziya talabgorining litsenziya talablari va shartlariga rioya qilishga roziligi;

b) talabgorning bankdagi hisobvarag‘ida mavjud bo‘lishi lozim bo‘lgan mablag‘ning minimal miqdori to‘g‘risida ma’lumot;

v) ta’lim jarayonlari yo‘lga qo‘yilishi rejalashtirilayotgan yo‘nalishlar va mutaxassisliklar ro‘yxati (ta’lim shakllari ko‘rsatilgan holda);

d) kadrlar tayyorlash yo‘lga qo‘yilayotgan ta’lim dasturlari bo‘yicha qabul rejasi (to‘liq o‘qish davomiyligi ko‘rsatilgan holda);

g) ta’lim tashkiloti tashkil etilayotgan o‘quv binolari, talabalar turar joyi va o‘quv jarayonini tashkil etish bilan bog‘liq boshqa bino va inshootlarning tegishli hujjatlari (oldi-sotdi shartnomasi yoki ko‘chmas mulk ijarasi shartnomasi (agar bino ijaraga olingan bo‘lsa), shuningdek ko‘chmas mulk obyektining kadastr pasporti, ko‘chmas mulk obyektiga egalik qilish, undan foydalanish va uni tasarruf etish huquqini tasdiqlovchi boshqa hujjatlar).

Arizani ko‘rib chiqish uchun to‘lanadigan yig‘im miqdori:

Bazaviy hisoblash miqdorining 2 baravari

Litsenziya berilganligi uchun davlat boji miqdori:

Bazaviy hisoblash miqdorining 10 baravari

Arizani ko‘rib chiqish muddatlari:

30 ish kunida

Litsenziya talablari va shartlari:

I. Nodavlat o‘rta maxsus, kasbiy, oliy va oliy ta’limdan keyingi ta’lim sohasida umumiy litsenziya talablari va shartlari:

a) ta’lim-tarbiya jarayoni tashkil etish uchun zarur bino
va inshootlar:

o‘rta maxsus ta’lim xizmatlarini ko‘rsatish uchun maydoni kamida – 2500 m²;

kasbiy ta’lim xizmatlarini ko‘rsatish uchun maydoni kamida – 2500 m²;

oliy ta’lim xizmatlarini ko‘rsatish uchun maydoni kamida 5000 m²;

oliy ta’limdan keyingi ta’lim xizmatlarini ko‘rsatish uchun maydoni uchun – 1000 m²*.

Nodavlat ta’lim xizmatini ko‘rsatish uchun ta’lim shaklidan qat’i nazar, talabgorga mulk huquqi asosida tegishli bo‘lgan o‘quv binolari, talabalar turar joyi
va o‘quv jarayonini tashkil etish bilan bog‘liq boshqa bino va inshootlarning mavjudligi.

Bunda nodavlat ta’lim tashkilotiga faoliyatining dastlabki 5 yilida bino va inshootlardan ijara huquqi asosida foydalanishga ruxsat beriladi *;

b) ta’limning majburiy ravishda dunyoviy xarakterda bo‘lishi, ta’lim jarayonida urushni, zo‘ravonlikni targ‘ib qilishdan foydalanishga, fuqarolarning konstitutsiyaviy huquqlari va erkinligi kamsitilishiga, ta’lim oluvchilar jinsiga ko‘ra ajratib o‘qitilishiga (qonunchilikda ayrim o‘quv fanlarni ajratib o‘qitish bo‘yicha belgilangan holatlar bundan mustasno), mamlakatdagi xavfsizlik va ijtimoiy-siyosiy barqarorlikka, jamiyatning huquqiy va ma’naviy asoslari, fuqarolar osoyishtaligiga, millatlararo va dinlararo totuvlikka raxna solinishiga, O‘zbekiston Respublikasi to‘g‘risida noto‘g‘ri axborotlar tarqatilishiga hamda uning tarixiy, madaniy va ma’naviy qadriyatlari buzib ko‘rsatilishiga yo‘l qo‘ymaslik*;

v) oliy ta’lim tashkilotida vakolatli davlat organi bilan kelishilgan holda yoshlar masalalari va ma’naviy-ma’rifiy ishlar bilan shug‘ullanadigan rektor maslahatchisi shtat birligi mavjudligi.*

g) nodavlat ta’lim tashkilotiga o‘qishga qabul qilish, o‘qishni ko‘chirish, qayta tiklash va o‘qishdan chetlashtirish bo‘yicha normativ-huquqiy hujjatlarga amal qilish*;

d) talabalarni bakalavriat va magistratura bosqichlariga ochiq tanlov tizimi orqali, zarur hollarda tabaqalashtirilgan to‘lov-kontrakt asosida belgilangan muddatlarda qabul qilish, o‘quv yilini faqat sentyabr (oktyabr) oyida boshlash, shuningdek, boshqa oliy ta’lim tashkilotlari talabalarining o‘qishini faqat ta’lim jarayoni tashkil etilgan kurslarga mos va turdosh yo‘nalishlarga ko‘chirib o‘tkazish orqali qabul qilish*;

boshqa ta’lim shakllariga umumiy qabul parametri kunduzgi ta’lim shaklidan ortib ketmasligi hamda ta’lim yo‘nalishlari va mutaxassisliklariga talabalarni tegishli ta’lim dasturlari belgilangan tartibda maxsus davlat akkreditatsiyasidan o‘tkazilganidan so‘ng navbatdagi (kelayotgan) o‘quv yili uchun belgilangan tartibda qabul qilish*;

ye) bitiruvchilarga belgilangan tartibda ta’lim to‘g‘risida hujjat berish;

j) qonunchilikda belgilangan muddatlarda, o‘rnatilgan tartibga muvofiq davlat akkreditatsiyasidan o‘tish*;

z) nodavlat ta’lim tashkilotlarining nomi, muhrlari, tamg‘alari, lavhalari, e’lonlari, narxnomalari, ish qog‘ozlarining matnlari va boshqa ko‘rgazmali hamda og‘zaki axborot matnlari davlat tilida bo‘lishi lozim (O‘zbekiston Respublikasining xalqaro shartnomalariga muvofiq O‘zbekiston Respublikasi Prezidentining yoki Vazirlar Mahkamasining qarorlari asosida tashkil etiladigan xorijiy ta’lim tashkilotlarining, shuningdek xalqaro tashkilotlarning ta’lim muassasalari filiallari (markazlari, ta’lim kampuslari) va boshqa bo‘linmalari bundan mustasno)*.

i) ta’lim tashkilotlari bitiruvchilarga beriladigan diplom ma’lumotlarini litsenziya bergan vakolatli organning ma’lumotlar bazasiga kiritish*.

II. Quyidagilar nodavlat ta’lim xizmatlarining litsenziyalanadigan faoliyat turlarining alohida talab
va shartlari hisoblanadi:

O‘rta maxsus ta’lim xizmatlarini ko‘rsatish bo‘yicha litsenziya talablari va shartlari

T/r	Litsenziya talablari va shartlari	Bajarilishi lozim bo‘lgan ko‘rsatkichlar
1.	O‘quv va o‘quv-metodik adabiyotlar hamda axborot-resurs bazasi bilan ta’minlanganligi:*	kamida 30 ta kompyuter texnikasi, skaner va nusxa ko‘chirish apparati bilan jihozlangan axborot-resurs markazi.
2.	Bitta sinf (guruh)dagi ta’lim oluvchilarning maksimal soni:*	26 nafargacha.
3.	O‘rta maxsus ta’lim tashkilotining hududiga qo‘yiladigan talablar:*	devor yoki panjara bilan o‘ralganligi; ko‘kalamzorlashtirilganligi; tungi yoritgichlar o‘rnatilganligi; ichimlik suv va kanalizatsiya bilan ta’minlanganligi; stadion (o‘yin maydoni) va dam olish qismlarining mavjudligi.
4.	O‘rta maxsus ta’lim tashkilotining hududida har bir ta’lim oluvchi uchun ajratiladigan umumiy maydon o‘lchami:*	Har bir ta’lim oluvchi uchun kamida – 8 m².
5.	O‘rta maxsus ta’lim tashkilotidagi xonalar hamda har bir ta’lim oluvchi yoki xodim uchun ajratiladigan maydon o‘lchami:*	a) ma’muriyat uchun: rahbar xonasi – 1 ta xona; o‘qituvchilar xonasi – 1 ta xona; metodik xona – 1 ta xona; ma’naviyat va ma’rifat xonasi – 1 ta xona; yoshlar yetakchisi xonasi – 1 ta xona; psixolog xonasi – 1 ta xona; tibbiyot xonasi – 1 ta xona; b) dars mashg‘ulotlari uchun: barcha fanlardan umumiy tipdagi sinfxonalar – 2 m²; boshlang‘ich sinf xonalari – 2 m²; frontal va individual mashg‘ulotlar uchun sinfxonalar – 2,5 m²; rasm, chizmachilik, musiqa fanlari uchun xonalar – 2,4 m²; informatika xonasi – 2,5 m²; chaqiriqqa qadar boshlang‘ich tayyorgarlik xonasi (mulyajlar saqlash xonasi bilan) – 2,4 m²; chet tili xonasi – 2,4 m²; ikkiga bo‘lib o‘qitiladigan fanlar uchun xona – 2,5 m²; texnologiya xonasi – 6 m²; kimyo, fizika, biologiya fanlaridan laboratoriya xonalari – 2,5 m²; sport zal (ta’lim oluvchilar soniga ko‘ra) – 9,0×18,0 m; 12,0×24,0 m; 18,0×30,0 m; v) qo‘shimcha xizmat ko‘rsatish uchun: kutubxonaning umumiy maydoni – 100 m²; faollar zali; oshxona; tibbiyot xonasi; xo‘jalik xonasi (har qavatda bittadan); o‘qituvchilar uchun hojatxona – 3 m² (har blokda alohida); ta’lim oluvchilar uchun hojatxona – 0,4 m² (o‘g‘il va qiz bolalarga alohida, har qavatda bittadan).
6.	Axborot texnologiyalari bilan ta’minlanganlik darajasi:*	kamida 50 % kompyuter texnikalari 10 mbit/sek tezlikdagi Internet jahon axborot tarmog‘iga ulanganligi; kamida 50 % hududda Wi-Fi zonalar tashkil etilishi.
7.	Ijtimoiy himoyaga muhtoj oilalar farzandlariga imtiyoz taqdim etilganligi:*	jami ta’lim oluvchilar umumiy sonining 10 foizidan kam bo‘lmagan miqdorda ijtimoiy himoyaga muhtoj oilalarning qobiliyatli va iqtidorli farzandlari tanlov asosida bepul o‘qishga qabul qilingan bo‘lishi (umumiy o‘rta ta’lim tashkilotlari uchun).

Kasbiy ta’lim xizmatlarini ko‘rsatish bo‘yicha litsenziya talablari va shartlari

T/r	Litsenziya talablari va shartlari	Bajarilishi lozim bo‘lgan ko‘rsatkichlar
1.	Talabgorning bankdagi hisobvarag‘ida mavjud bo‘lishi lozim bo‘lgan mablag‘ning minimal miqdori:*	25 ming AQSH dollari miqdori ekvivalentidagi mablag‘ va bu mablag‘ning yetarli miqdorini doimiy ta’minlab borish.
2.	O‘quv va o‘quv-metodik adabiyotlar hamda axborot-resurs bazasi bilan ta’minlanganligi:*	a) kamida 20 ta kompyuter texnikasi bilan jihozlangan kompyuter sinflari; b) kamida 30 ta kompyuter texnikasi, skaner va nusxa ko‘chirish apparati bilan jihozlangan axborot-resurs markazi; v) Masofaviy ta’lim shaklida faoliyat yuritganda: yuklamasi rejadagi ta’lim oluvchilar soniga mo‘ljallangan, ta’lim tashkilotiga tegishli bo‘lgan, mamlakat hududida joylashgan (mulkiy yoki boshqa ashyoviy huquq asosida o‘ziga tegishli bo‘lgan) server qurilmasi; SCORM standarti talablariga muvofiq bo‘lgan LMS platformasining mavjudligi. Onlayn va masofaviy ta’lim platformasi va unda quyidagi imkoniyatlar mavjudligi: ta’lim oluvchi bilim bo‘shliqlari va ta’lim ehtiyojlarini aniqlash diagnostika-baholash funksiyasi; individual ta’lim ehtiyojlari asosida ta’lim dasturini va kurslarni taklif etish funksiyasi: onlayn vebinar tizimi; interaktiv test va topshiriqlar asosida baholash imkoniyati; qayta aloqa tizimi; ma’lumotlar bazasi xavfsizligi kafolati; ta’lim to‘g‘risidagi hujjat yagona ma’lumotlar bazasiga ulanish imkoniyati.
3.	Bitta guruhdagi ta’lim oluvchilarning maksimal soni:*	30 nafargacha.
4.	Ta’lim tashkilotining hududiga qo‘yiladigan talablar:*	ko‘kalamzorlashtirilganligi; tungi yoritgichlar o‘rnatilganligi; ichimlik suv va kanalizatsiya bilan ta’minlanganligi; stadion (o‘yin maydoni) va dam olish qismlarining mavjudligi.
5.	Ta’lim tashkilotining hududida (o‘quv binosidan tashqari) har bir ta’lim oluvchi uchun ajratiladigan maydon o‘lchami:*	Har bir ta’lim oluvchi uchun kamida – 8 m².
6.	Ta’lim tashkilotidagi xonalar hamda har bir ta’lim oluvchi yoki xodimlar uchun ajratiladigan minimal maydon o‘lchami:*	a) ma’muriyat uchun: rahbar xonasi – 1 ta xona; o‘qituvchilar xonasi – 1 ta xona; metodik xona – 1 ta xona; ma’naviyat va ma’rifat xonasi – 1 ta xona; yoshlar yetakchisi xonasi – 1 ta xona; psixolog xonasi – 1 ta xona; tibbiyot xonasi – 1 ta xona; b) dars mashg‘ulotlari uchun: o‘quv auditoriyalari – 2 m²; kompyuter zali (sinfi) – 2,5 m²; chet tili xonasi – 3,8 m²; maxsus fanlar bo‘yicha laboratoriyalar – 2 m²; texnik va maxsus laboratoriyalar – 2,4 m²; o‘quv-texnik vositalar bilan jihozlangan o‘quv auditoriyalari – 2,4 m²; sport zal (ta’lim oluvchilar soniga ko‘ra) – 12,0×24,0 m; 18,0×36,0 m; v) qo‘shimcha xizmat ko‘rsatish uchun: kutubxonaning umumiy maydoni – 100 m²; faollar zali; oshxona (bufet); xo‘jalik xonasi; o‘qituvchilar uchun hojatxona – 3 m²(har blokda alohida); ta’lim oluvchilar uchun hojatxona (o‘g‘il va qiz bolalarga alohida, har qavatda bittadan); ta’lim oluvchilar turar joyi – umumiy kontingentning 30 foiziga mo‘ljallangan. tashkil etilayotgan kasb va mutaxassisliklar bo‘yicha o‘quv amaliyot (laboratoriya va o‘quv ustaxonalar)i mavjudligi va ularning to‘liq jihozlanganligi.
7.	Axborot texnologiyalari bilan ta’minlanganlik darajasi:*	kamida 75% kompyuter texnikalari 20 mbit/sek tezlikdagi Internet jahon axborot tarmog‘iga ulanganligi; kamida 50 % hududda Wi-Fi zonalar tashkil etilishi.

Oliy ta’lim xizmatlarini ko‘rsatish bo‘yicha
litsenziya talablari va shartlari

T/r	Litsenziya talablari va shartlari	Bajarilishi lozim bo‘lgan ko‘rsatkichlar
1.	Talabgorning bankdagi hisobvarag‘ida mavjud bo‘lishi lozim bo‘lgan mablag‘ning minimal miqdori:*	300 ming AQSH dollari yoki shu miqdor ekvivalentidagi mablag‘ va bu mablag‘ning yetarli miqdorini doimiy ta’minlab borish.
2.	O‘quv va o‘quv-metodik adabiyotlar hamda axborot-resurs bazasi bilan ta’minlanganligi:*	a) kamida 40 ta kompyuter texnikasi bilan jihozlangan kompyuter sinflari; b) kamida 40 ta kompyuter texnikasi, skaner va nusxa ko‘chirish apparati bilan jihozlangan axborot-resurs markazi (har bir kompyuter texnikasi uchun kamida 4 m² maydon ajratilishi lozim). v) Masofaviy ta’lim shaklida faoliyat yuritganda: yuklamasi rejadagi ta’lim oluvchilar soniga mo‘ljallangan, ta’lim tashkilotiga tegishli bo‘lgan, mamlakat hududida joylashgan (mulkiy yoki boshqa ashyoviy huquq asosida o‘ziga tegishli bo‘lgan) server qurilmasi; SCORM standarti talablariga muvofiq bo‘lgan LMS platformasining mavjudligi. Onlayn va masofaviy ta’lim platformasi va unda quyidagi imkoniyatlar mavjudligi: ta’lim oluvchi bilim bo‘shliqlari va ta’lim ehtiyojlarini aniqlash diagnostika-baholash funksiyasi; individual ta’lim ehtiyojlari asosida ta’lim dasturini va kurslarni taklif etish funksiyasi: onlayn vebinar tizimi; interaktiv test va topshiriqlar asosida baholash imkoniyati; qayta aloqa tizimi; ma’lumotlar bazasi xavfsizligi kafolati; ta’lim to‘g‘risidagi hujjat yagona ma’lumotlar bazasiga ulanish imkoniyati.
3.	Ta’lim oluvchilarning minimal va maksimal soni:*	guruhda – 20 – 30 nafar; potokda – 40 – 90 nafar. O‘quv binolarining umumiy quvvatiga nisbatan barcha ta’lim shakllari bo‘yicha tahsil olayotgan jami talabalar soni 3 baravardan ortib ketmasligi. Boshqa ta’lim shakllariga umumiy qabul parametri kunduzgi ta’lim shaklidan ortib ketmasligi.
4.	Oliy ta’lim tashkilotining hududi (o‘quv binosidan tashqari)ga qo‘yiladigan talablar:*	devor yoki panjara bilan o‘ralganligi; ko‘kalamzorlashtirilganligi; tungi yoritgichlar o‘rnatilganligi; ichimlik suv va kanalizatsiya bilan ta’minlanganligi; stadion (sport ta’lim yo‘nalishlari mavjud bo‘lsa) va dam olish qismlarining mavjudligi.
5.	Oliy ta’lim tashkilotining hududida ajratiladigan maydon o‘lchami:*	Har bir ta’lim oluvchi uchun kamida – 8 m².
6.	Oliy ta’lim tashkilotidagi xonalar hamda har bir ta’lim oluvchi yoki xodimlar uchun ajratiladigan minimal maydon o‘lchami:*	a) ma’muriyat uchun: rektoratdagi barcha ma’muriy-boshqaruv jarayonini amalga oshirish uchun mo‘ljallangan xonalar – 1 tadan xona; b) dars mashg‘ulotlari uchun: o‘quv auditoriyalari – 2,2 m²; kompyuter zali (sinfi) – 4 m²; chet tili xonasi – 2,4 m²; umumnazariy va umumta’lim laboratoriya xonalari – 4 m²; texnik va maxsus laboratoriyalar – 6 m²; alohida kabinalarga ajratilgan fonozallar – 3 m²; o‘quv-texnik vositalar bilan jihozlangan o‘quv auditoriyalari – 2,4 m²; kurs loyihasi va malakaviy bitiruv ishlarini bajarish zallari – 3,6 m² (arxitektura-qurilish va badiiy OTTlar uchun – 6 m²); sport zal (sport ta’lim yo‘nalishlari hamda o‘quv rejalarida sportga oid fanlari mavjud bo‘lsa) – 12,0×18,0 m; 12,0×24,0 m; 15,0×24,0 m; 18,0×38,0 m va undan yuqori; v) qo‘shimcha xizmat ko‘rsatish uchun: kutubxonaning umumiy maydoni (har bir o‘quv binosida) – 200 m²; faollar zali; oshxona (bufet); tibbiyot xonasi; ta’lim oluvchilar turar joyi – Toshkent shahri uchun har 5 nafar ta’lim oluvchiga 1 o‘rin (joy) nisbatida, boshqa hududlarda har 10 nafar ta’lim oluvchiga 1 o‘rin (joy) nisbatida.
7.	Axborot texnologiyalari bilan ta’minlanganlik darajasi:*	kamida 75 % kompyuter texnikalari 20 mbit/sek tezlikdagi Internet jahon axborot tarmog‘iga ulanganligi; kamida 50 % hududda Wi-Fi zonalar tashkil etilishi.
8.	O‘quv auditoriyalarida ta’lim faoliyati uchun yaratilgan sharoitlarga qo‘yiladigan minimal talablar:*	proyektor yoki o‘lchami 1500×1000, 1500×2000, 2500×2000 bo‘lgan elektron yoxud oddiy doska – 1 dona;auditoriyaning yoritilish darajasi – 400 lyuks.
9.	Masofaviy ta’limni tashkil etish:*	Ta’lim tashkilotlarida masofaviy ta’limni tashkil etish Vazirlar Mahkamasi tomonidan belgilangan tartib asosida tashkil etiladi.

Oliy ta’limdan keyingi ta’lim xizmatlarini ko‘rsatish bo‘yicha litsenziya talablari va shartlari

T/r	Litsenziya talablari va shartlari	Bajarilishi lozim bo‘lgan ko‘rsatkichlar
1.	O‘quv va o‘quv-metodik adabiyotlar hamda axborot-resurs bazasi bilan ta’minlanganligi:*	kamida 10 ta kompyuter texnikasi bilan jihozlangan elektron kutubxona; kamida 5 ta kompyuter texnikasi, skaner va nusxa ko‘chirish apparati bilan jihozlangan axborot-resurs markazi.
2.	Oliy ta’limdan keying ta’lim tashkilotining hududiga qo‘yiladigan talablar:*	ko‘kalamzorlashtirilganligi; tungi yoritgichlar o‘rnatilganligi; ichimlik suv va kanalizatsiya bilan ta’minlanganligi; dam olish qismlarining mavjudligi.
3.	Oliy ta’limdan keyingi ta’lim tashkilotidagi xonalarga qo‘yiladigan talablar:*	rahbar xonasi – 1 ta xona; ilmiy rahbarlar xonasi – 1 tadan xona; kollegial organ xonasi – 1 ta xona; ilmiy kotib xonasi – 1 ta xona; ixtisosliklar bo‘yicha tadqiqotchilar xonasi – 1 tadan xona; tibbiyot xonasi – 1 ta xona; tashkil etilayotgan ixtisosliklar xususiyatidan kelib chiqib, maxsus (ilmiy laboratoriya) xonalar mavjudligi va ularning to‘liq jihozlanganligi.
4.	Oliy ta’limdan keyingi ta’lim turi bo‘yicha moddiy-texnik bazaning holati:*	ixtisosliklar bo‘yicha ilmiy laboratoriyalarning mavjudligi; ilmiy-tadqiqotlarni olib borish uchun zamonaviy asbob-uskunalar, materiallar, axborot-kommunikatsiya vositalari, kompyuter texnikasi, maishiy texnika va boshqa zarur vositalarning yetarli darajada mavjudligi; eksperimental bazaning mavjudligi.
5.	Axborot texnologiyalari bilan ta’minlanganlik darajasi:*	kompyuter texnikalari 20 mbit/sek tezlikdagi Internet jahon axborot tarmog‘iga ulanganligi;kamida 50 % hududda Wi-Fi zonalar tashkil etilishi.

10.

Litsenziya berishda kelishiladigan organlar:

a) davlat yong‘in nazorati organlari tomonidan mavjud binolar va xonalarning yong‘in xavfsizligi talablariga muvofiqligi to‘g‘risidagi xulosa (5 ish kuni ichida);

b) Sanitariya-epidemiologik osoyishtalik va jamoat salomatligi qo‘mitasining tuman (shahar) bo‘limlari tomonidan sanitariya qoidalari, normalari va gigiyena normativlariga muvofiqligi to‘g‘risidagi xulosa (5 ish kuni ichida);

v) Qurilish va uy-joy kommunal xo‘jaligi sohasida nazorat qilish inspeksiyasi tomonidan obyektda shaharsozlik norma va qoidalarida belgilangan talablarga muvofiq nogironligi bo‘lgan shaxslar uchun to‘siqlarsiz muhit yaratilganligi to‘g‘risidagi xulosa (5 ish kuni ichida).

11.

Litsenziyaning amal qilish muddati:

cheklanmagan

12.

Izoh.

Nodavlat ta’lim xizmatlari ko‘rsatuvchi yuridik shaxslarga ta’limning har bir turi uchun alohida litsenziya beriladi. Litsenziyada faoliyatning litsenziyalanayotgan turi aniq ko‘rsatiladi.

Nodavlat oliy ta’lim tashkilotining boshqa hududdagi har bir faoliyat manzili uchun alohida litsenziya olishi talab etiladi. Bunda oliy ta’lim xizmatlarini ko‘rsatish bo‘yicha barcha litsenziya talablariga amal qilish majburiy hisoblanadi.

Litsenziya olish uchun topshirilgan hujjatlarni ko‘rib chiqish jarayoniga ta’lim turi tegishli bo‘lgan ta’lim sohasidagi vakolatli davlat boshqaruvi organlari, tizimida ta’lim muassasalari bo‘lgan vazirliklar, idoralar, ularning hududiy bo‘limlari
va bo‘ysunuvidagi idoraviy mansub tashkilotlar xodimlari, shuningdek, boshqa mutaxassislar, nodavlat notijorat tashkilotlar vakillari va xorijiy ekspertlar fuqarolik-huquqiy shartnomalar asosida jalb etilishi mumkin.

* Qo‘pol ravishda buzish deb hisoblanadigan talab
va shartlar.

1 241

Mavzuga doir yangiliklar