Joriy yilning 27-may kuni AQSH Davlat Departamenti xorijlik talabalar uchun vizalar bo‘yicha uchrashuvlarni vaqtincha to‘xtatdi. Bu haqda The Washington Post nashriyoti xabar berdi.
Ma’lum qilinishicha, bu chora talabalar va boshqa almashinuv dasturi ishtirokchilarining ijtimoiy tarmoqlardagi faoliyatlarini kengroq tekshirishga tayyorgarlik sifatida amalga oshirilmoqda.
Mutaxassislar bu qarorni Tramp ma’muriyatining antisemitizm tarqalishiga yo‘l qo‘yayotgan universitetlarga qarshi kompaniyasidagi xavotirli rivojlanish deb hisoblamoqda.
Ichki ko‘rsatmada aytilishicha, hozircha yangi talaba va almashinuv vizalari uchun uchrashuvlar qo‘shilmaydi va bo‘sh qolgan uchrashuv vaqtlarini darhol bekor qilish kerak.
Bu ma’lumot Politico nashri tomonidan birinchi marta e’lon qilingan. Davlat Departamentining yuqori mansabdori The Post’ga bu xatning rostligini tasdiqlagan.
Donald Tramp ma’muriyati yaqinda Harvard universitetini xorijlik talabalarni qabul qilishdan to‘xtatishga harakat qilgan va federal idoralarga bu universitet bilan shartnomalarni bekor qilishni buyurgan. Shuningdek, ijtimoiy tarmoqlarda Falastin tarafdori siyosiy fikrlarni bildirgan talabalarni hibsga olish va ularning huquqiy maqomini bekor qilish choralari ko‘rilmoqda.
Davlat Departamenti ko‘rsatmasida aytilishicha, ijtimoiy tarmoqlarni tekshirish jarayonlarini kengaytirish uchun hozirgi amaliyotlar qayta ko‘rib chiqilmoqda va tez orada yangi ko‘rsatmalar chiqadi.
Matbuot kotibi Tammy Brus bu jarayon haqida batafsil ma’lumot bermagan, ammo “biz mamlakatga kelayotgan har bir kishini to‘liq tekshirish uchun barcha imkoniyatlardan foydalanamiz” deb ta’kidlagan.
AQShda har yili 1 milliondan ortiq xalqaro talabalar o‘qiydi, ular iqtisodiyotga katta hissa qo‘shadi. Xalqaro Ta’lim Mutaxassislari Uyushmasi ma’lumotiga ko‘ra, 2023-2024 o‘quv yilida xalqaro talabalar AQShga taxminan 44 milliard dollar kiritgan.
Tahlil markazi National Foundation for American Policy ijrochi direktori Styuart Andersonning fikricha, agar Donald Tramp ma’muriyati talabalar vizalarini berishni yanada qiyinlashtirsa, AQShga kelayotgan talabalar soni kamayadi. Talabalar o‘qish va kelajakdagi ish imkoniyatlari haqida ishonchli ma’lumot olishni xohlaydi.
Uning aytishicha, konsullik xodimlari ijtimoiy tarmoqlardagi postlar asosida qaror qabul qilsa, talabalar rad javobining sababini bilmay qolishi mumkin.
