6 kunlik ish haftasida ishlovchi xodimlarga bugun ish kuni boʻlib, Mehnat kodeksining 187-moddasiga asosan ishlanmaydigan bayram kunlari arafasida ish vaqti kamida bir soatga qisqartiriladi.
Bu qoida smena asosida ishlovchilarga ham tegishli.
Ish vaqti qisqarishining ish haqiga ta’siri bo’lmaydi. Ish vaqti 1 soatga qisqartiriladi, lekin ish haqi toʻliq toʻlanadi.
Bayramdan oldingi kuni ish vaqtini 1 soatga qisqartirish imkoni boʻlmagan tashkilotlarda aynan shu 1 soat uchun otgul berilishi yoki kamida 2 baravar haq toʻlanishi kerak.
Bu qoida xodimlarga bayramga tayyorgarlik koʻrish, oilasiga koʻproq vaqt ajratish va dam olishga sharoit yaratish uchun berilgan qoʻshimcha ijtimoiy kafolat hisoblanadi.
Ma’lumot uchun 2026-yilda 8-mart — Xotin-qizlar kuni kalendar bo‘yicha yakshanba kuniga to‘g‘ri keladi. Shu sababli bayram munosabati bilan dushanba kuni ham dam olish kuni etib belgilandi.
Mehnat kodeksining 208-moddasiga ko‘ra, agar dam olish kuni ishlanmaydigan bayram kuniga to‘g‘ri kelsa, dam olish kuni bayramdan keyingi ish kuniga ko‘chiriladi.
Ushbu qoidaga muvofiq, dam olish kunlari quyidagi tartibda taqsimlanadi:
Haftada 5 kun ishlaydiganlar uchun:
- 7-mart (shanba) — odatiy dam olish kuni;
- 8-mart (yakshanba) — Xotin-qizlar bayrami;
- 9-mart (dushanba) — bayram yakshanba kuniga to‘g‘ri kelgani sababli ko‘chirilgan qo‘shimcha dam olish kuni.
Shu tariqa, haftasiga 5 kun ishlaydiganlar uchun 3 kun ketma-ket dam olish kuni bo‘ladi.
Haftada 6 kun ishlaydiganlar uchun:
- 8-mart (yakshanba) — bayram kuni;
- 9-mart (dushanba) — ko‘chirilgan dam olish kuni.
Shuningdek, joriy yilda Navro‘z bayrami va Ramazon hayitining birinchi kuni aynan bir kunga — 21 mart, shanba kuniga to‘g‘ri kelishi kutilmoqda. Shu sababli, haftada 5 kun ishlaydigan xodimlar uchun 21 mart (shanba), 22 mart (yakshanba) va 23 mart (dushanba — ko‘chirilgan dam olish kuni) hisobiga jami 3 kunlik dam olish beriladi.
Haftada 6 kun ishlaydiganlar uchun esa 21 va 22-mart kunlari dam olish kuni bo‘ladi.
