Xabaringiz bor, joriy yilning 22-oktyabridan 31-oktyabrigacha 2025-2026- o‘quv yili doirasida “Mening maktabim” loyihasining birinchi bosqichiga taklif kiritish jarayonlari bo‘lib o‘tadi.
Bunda maktab o‘quvchilari taklif kiritish uchun openbudget.uz sayti orqali “Mening maktabim” bo‘limidagi “Ishtirok etish” tugmasini bosishlari kerak.
Mazkur bo‘limda hudud bo‘yicha joylashgan maktab tanlab olinadi va “Loyiha kiritish” tugmasi bosiladi. So‘ng loyiha kiritishda “Shablon orqali” va “Mustaqil yaratish” maydonlari paydo bo‘ladi.
Bu yerda siz xohishingizga ko‘ra tugmalardan birini tanlaysiz. Masalan, agar “Shablon orqali” tugmasini bossangiz, sizga 50 ga yaqin namunaviy loyihalar taqdim etiladi. Ular orasidan o‘zingizga keraklisini tanlab, sinfingiz va ism-sharifingizni belgilagandan so‘ng, kalit so‘zni kiritasiz.
Eslatib o‘tamiz, sizdan talab qilinadigan kalit so‘z e-maktab tizimiga bog‘langan. Ya’ni aynan siz uchun mas’ul bo‘lgan yaqin qarindoshlaringizning telefon raqamlariga SMS shaklida yuborilgan bo‘ladi.
Ushbu kodni ulardan olib sir saqlagan holda kalit so‘z sifatida foydalanishingiz mumkin.
Agar siz mustaqil ravishda taklif kiritish istagida bo‘lsangiz, “Mustaqil yaratish” tugmasini bosishingiz so‘raladi. Shundan so‘ng loyiha nomini yozasiz, yo‘nalishni tanlaysiz. Umumiy ya’ni taxminiy qiymatini kiritasiz va qisqacha mazmunini bayon etasiz.
Loyiha uchun rasm yuklagandan so‘ng “Loyiha kiritish” tugmasini bosib, sinfingiz va ism-sharfingizni belgilab, kalit so‘zni kiritib, tasdiqlash tugmasini bosasiz.
