Prezidentning PF-190-son Farmoni bilan Kasbiy ta’lim agentligining asosiy vazifalari belgilandi.
Jumladan, Agentlik tomonidan,
Kasbiy ta’limni muvofiqlashtirish bo‘yicha:
– texnikumlar faoliyati metodik jihatdan muvofiqlashtiriladi va boshqariladi;
– direktor va ularning o‘rinbosarlari tanlov asosida tayinlanadi;
– mehnat bozori ehtiyojidan kelib chiqib, o‘quvchilarni qabul qilish rejasi tasdiqlanadi;
– mulkchilik shaklidan qat’i nazar barcha texnikumlar uchun majburiy bo‘lgan kasbiy ta’lim dasturlari bo‘yicha beriladigan malaka darajalari, o‘qitishning minimal muddatlari, bitiruvchilar bilimini baholash tartibi va texnikumlarning o‘quv-metodik bazasiga qo‘yiladigan yagona talablar belgilanadi.
Ta’lim mazmuni va dasturlarini takomillashtirish bo‘yicha:
– tabaqalashtirilgan o‘quv dasturlari ishlab chiqilib, amaliyotga joriy qilinadi;
– texnikum va korxonalar o‘rtasida hamkorlik kengaytirilib, dual ta’lim tizimi rivojlantiriladi;
– hayot davomida o‘qish tamoyili tatbiq etilib, aholining turli toifalari uchun kasbga o‘qitish imkoniyatlari yaratiladi;
– o‘quv jarayonida interaktiv, raqamli va innovatsion o‘qitish texnologiyalari joriy etiladi;
– texnikumlar o‘quv-uslubiy materiallar va adabiyotlar bilan ta’minlanadi.
Pedagog kadrlar salohiyatini oshirish bo‘yicha:
– o‘qituvchilarni qayta tayyorlash va malakasini oshirish tashkil qilinadi;
– pedagoglar attestatsiyadan o‘tkazilib, ularga malaka toifalari beriladi;
– pedagoglar faoliyatini samarali baholash va rag‘batlantirish tizimi joriy etiladi.
Infratuzilmani rivojlantirish bo‘yicha:
– texnikumlarning laboratoriya va ustaxonalari zamonaviy texnika, asbob-uskuna va sarflovchi materiallar bilan ta’minlanadi;
– kasbiy ta’limda davlat-xususiy sheriklik rivojlantiriladi.
Xalqaro hamkorlikni kengaytirish bo‘yicha:
– qo‘shma va xalqaro ta’lim dasturlari asosida kadrlar tayyorlash yo‘lga qo‘yiladi;
– xorijiy mutaxassislar ta’lim jarayoniga jalb etiladi, mahalliy o‘qituvchilar chet elda malaka oshirishga yuboriladi;
– kasbiy ta’lim dasturlarini xalqaro akkreditatsiyadan o‘tkazishga ko‘maklashiladi.
Ushbu yo‘nalishlar kasbiy ta’lim tizimini zamon talablari darajasida rivojlantirishga xizmat qiladi.
