Qoraqalpog‘istonda havo isib ketishi tufayli davlat bog‘chalari o‘z faoliyatini vaqtincha to‘xtatadi. Bu haqda Qoraqalpog‘iston Respublikasi Maktabgacha va maktab ta’limi vazirligi xabar berdi.
Vazirlik xabariga ko‘ra, ob-havoning keskin isib ketishi munosabati bilan shahar va tuman hokimlarining qaroriga asosan ayrim hududlardagi davlat maktabgacha ta’lim tashkilotlarining faoliyati vaqtincha to‘xtatiladi.
Bular quyidagilar:
- Nukus shahri – 2026-yil 13-iyuldan 18-iyulgacha;
- Amudaryo tumani – 2026-yil 13-iyuldan 15-iyulgacha;
- Beruniy tumani – 2026-yil 13-iyuldan 17-iyulgacha;
- Xo‘jayli tumani – 2026-yil 13-iyuldan 18-iyulgacha;
- Taxiatosh tumani – 2026-yil 13-iyuldan 18-iyulgacha;
- Shumanay tumani – 2026-yil 13-iyuldan 17-iyulgacha;
- Mo‘ynoq tumani – 2026-yil 13-iyuldan 17-iyulgacha;
- Qonliko‘l tumani – 2026-yil 13-iyuldan 17-iyulgacha;
- To‘rtko‘l tumani – 2026-yil 13-iyuldan 17-iyulgacha.
Qayd etilishicha, bu qaror bolalarning sog‘lig‘ini issiq havoning ta’siridan himoya qilish va xavfsizligini ta’minlash maqsadida qabul qilingan. Ishni vaqtincha to‘xtatish tartibi Sanitariya-epidemiologik osoyishtalik va jamoat salomatligi bo‘limlarining tegishli xulosalari va tavsiyalariga muvofiq amalga oshiriladi.
“Hurmatli ota-onalar!
Farzandlaringiz salomatligiga alohida e’tibor qaratishingizni, kunning eng issiq paytlarida ularning ochiq havoda uzoq vaqt bo‘lishiga yo‘l qo‘ymasligingizni va zarur ehtiyot choralariga rioya qilishingizni so‘raymiz”, – deyiladi xabarda.
Avvalroq, Buyuk Britaniyaning Janubi-g‘arbiy hududlarida kuzatilayotgan kuchli issiq ob-havo sababli ayrim maktablar vaqtincha yopilayotganligi haqida xabar berilgan edi.
