Oʻzbekiston Respublikasi Prezidentining jismoniy tarbiya fani oʻqitilishini takomillashtirish va oʻqituvchilarning kasbiy faoliyatini rivojlantirishga oid qarori qabul qilindi. Ushbu qaror, maktab oʻquvchilarini jismoniy tarbiya va sportga keng jalb etish, sogʻlom turmush tarzini targʻib qilish hamda sport sohasida isteʼdodli yoshlarni aniqlashga qaratilgan qator chora-tadbirlarni nazarda tutadi.
Qarorda jismoniy tarbiya fani oʻqituvchilari uchun zamonaviy oʻquv-metodik qoʻllanmalar ishlab chiqish, ularning kasbiy mahorati va malakasini oshirish uchun maxsus oʻquv dasturlarini yangilash vazifalari belgilangan. Shuningdek, fani oʻqituvchilarini tanlov asosida shakllantirish va ularning malakasini baholashning yangi tizimi ishlab chiqiladi.
Bundan tashqari, maktablarda oʻquvchilar boʻsh vaqtini mazmunli oʻtkazish uchun sport klublari tashkil etiladi. Ushbu klublarning vazifalari quyidagilardan iborat:
– jismoniy tarbiya va sportni targʻib qilish;
– isteʼdodli yoshlarni aniqlash;
– oʻquvchilar oʻrtasida turli sport musobaqalari va ommaviy tadbirlar oʻtkazish;
– sport turlari boʻyicha xalqaro musobaqalarda ishtirok etish uchun jamoalar tayyorlash.
Maktab sport klublari faoliyati
2025-2026-oʻquv yilidan boshlab har bir maktabda bosqichma-bosqich sport klublari tashkil etiladi. Klublar orqali oʻquvchilarga jismoniy tarbiya bilan muntazam shugʻullanish uchun sharoit yaratiladi, turli musobaqalar orqali iqtidorli yoshlar saralab olinadi.
Shuningdek, maktab sport klublari tarkibidagi aʼzo oʻquvchilar uchun xalqaro sport musobaqalari gʻoliblari bilan maxsus mashgʻulotlar tashkil etiladi.
Oʻqituvchilarning bilim darajasi va kasbiy mahoratini baholash boʻyicha milliy tizim yaratiladi. Shuningdek, maktablarda oʻquvchilarning sportga jalb etilganlik darajasi, sport klublari faoliyati samaradorligini baholovchi reyting tizimi joriy etiladi.
Bundan tashqari, jismoniy tarbiya oʻqituvchilariga malaka toifasini berishning yangi tizimi joriy etiladi. U ikki bosqichda amalga oshiriladi: test sinovlari va amaliy imtihon.
“Besh tashabbus olimpiadasi”
Qarorda har yili maktab oʻquvchilari oʻrtasida mini-futbol, voleybol, yengil atletika, shaxmat, shashka, stol tennisi, stritbol, vorkaut kabi sport turlari boʻyicha “Besh tashabbus olimpiadasi” musobaqalari tashkil etish koʻzda tutilgan. Ushbu musobaqalar uch bosqichda oʻtkaziladi: sinflararo, maktablararo, va hududiy bosqichlar.
2025-yilda ushbu tadbirlarni amalga oshirish uchun moliyalashtirish respublika byudjeti hisobidan amalga oshiriladi, 2026-yildan esa Davlat byudjeti parametrlarida nazarda tutiladi.
Bu qaror Oʻzbekistonda jismoniy tarbiya va sport sohasida sifatli va samarali taʼlim tizimini yaratish, maktablarda sogʻlom turmush tarzini keng targʻib qilish yoʻlida yangi bosqichni boshlab bermoqda.
