2024–2026-yillarda pedagoglarni kasbiy sertifikatlash natijalari bo‘yicha tahlil e’lon qilindi. Unga ko‘ra, hududlar kesimida eng yuqori natija Buxoro viloyatida qayd etilgan. Pedagoglarning 49,7 foizi sertifikat olgan.
Ta’lim sifatini ta’minlash milliy agentligi tomonidan 2026-yil 8-sentyabr holatiga ko‘ra, pedagog.uzedu.uz yagona elektron bazasi ma’lumotlari asosida kasbiy sertifikatlash natijalari bo‘yicha tahlil tayyorlandi.
Unga ko‘ra, 2024–2026-yillarda 47 936 nafar pedagog kasbiy sertifikatlash sinoviga jalb etilgan. Shundan 18 079 nafari yoki 37,7 foizi sertifikat olgan, 7 560 nafar pedagog esa sinovda umuman ishtirok etmagan.
Hududlar kesimida Buxoro viloyati 49,7 foizlik natija bilan birinchi o‘rinni egallagan. Andijon viloyatida esa sertifikat olgan pedagoglar ulushi 24,9 foizni tashkil qilgan. Ikki hudud o‘rtasidagi farq 24,8 foiz punktni tashkil etadi.

Kasbiy sertifikatlash natijalari pedagoglarni tayyorlagan oliy ta’lim tashkilotlari kesimida ham tahlil qilingan. Kamida 200 nafar bitiruvchisi sinovda qatnashgan 28 ta oliygoh reytingga kiritilgan.
Oliy ta’lim tashkilotlari orasidagi eng yuqori natija Samarqand davlat chet tillar institutida qayd etilgan — uning bitiruvchilarining 58,2 foizi sertifikat olgan. Keyingi o‘rinlarda Toshkent davlat o‘zbek tili va adabiyoti universiteti — 52,8 foiz hamda O‘zbekiston davlat jahon tillari universiteti — 52,4 foiz natija qayd etgan.
Reytingdagi eng yuqori va eng past ko‘rsatkichlar o‘rtasidagi tafovut 2,6 baravarni tashkil etgan.

Tahlilda pedagoglarning ish staji bo‘yicha natijalar ham keltirilgan. 20 yil va undan ortiq ish stajiga ega pedagoglarning 19,2 foizi sertifikat olgan bo‘lsa, yangi ish boshlagan pedagoglarda bu ko‘rsatkich 45,2 foizni tashkil etgan.
Kasbiy sertifikatlash 46 ta o‘quv fani va mutaxassislik bo‘yicha o‘tkazilgan. Kamida 100 nafar ishtirokchisi bo‘lgan fanlar orasida eng yuqori natija davlat va huquq asoslari fanida qayd etilgan — 75,1 foiz. Eng past ko‘rsatkich informatika va axborot texnologiyalari faniga to‘g‘ri kelib, 19,2 foizni tashkil etgan.
Amaldagi tartibga ko‘ra, kasbiy sertifikatlash nazorat sinovi 50 ta topshiriqdan iborat bo‘lib, har bir to‘g‘ri javob uchun 2 balldan beriladi. Talabgor sertifikat olish uchun kamida 56 ball, ya’ni 50 ta topshiriqdan kamida 28 tasiga to‘g‘ri javob berishi kerak.
Hududlar, fanlar va 28 ta oliy ta’lim tashkiloti kesimidagi natijalar bilan Ta’lim sifatini ta’minlash milliy agentligi tomonidan e’lon qilingan tahliliy sharhda tanishish mumkin.
Eslatib o‘tamiz, avvalroq agentlik tomonidan 73 ta akademik litseyda o‘quvchilar va pedagoglar o‘rtasida so‘rovnoma o‘tkazilgan edi. Unda 27 mingdan ortiq respondent qatnashib, dars sifati, o‘qituvchilar faoliyati va ta’lim sharoitlariga munosabatini bildirgan.
