Nodavlat OTMda ham davlat granti asosida oʻqish mumkinmi?

Nodavlat oliy ta’lim muassasasida ham ayrim talabalar davlat granti asosida tahsil olishi mumkin. Prezidentning tegishli qarori bilan respublikada faoliyat yuritayotgan xorijiy oliy ta’lim tashkilotlari va ularning filiallari hamda nodavlat oliy ta’lim tashkilotlarida davlat granti asosida kadrlar tayyorlash bo‘yicha 1 000 ta o‘rin ajratib borish belgilangan.

Bunda Oliy ta’lim, fan va innovatsiyalar vazirligi davlat granti asosida kadrlar tayyorlash bo‘yicha davlat buyurtmachisi hisoblanadi. Shuning uchun har yili 1-iyulga qadar mazkur davlat grantining oliy ta’lim tashkilotlari va bakalavriat ta’lim yo‘nalishlari bo‘yicha taqsimoti vazirlikning takliflari asosida tasdiqlib, vazirlikning rasmiy veb-saytida e’lon qilinadi.

Respublikada faoliyat yuritayotgan xorijiy va nodavlat oliy ta’lim tashkilotlariga kirish imtihonlari yakunlangach bir oy muddatda ballar ketma-ketligiga rioya qilgan holda, eng yuqori ball to‘plagan va davlat grantini olish istagini bildirgan talaba, tegishli oliy ta’lim tashkiloti hamda Oliy ta’lim, fan va innovatsiyalar vazirligi o‘rtasida uch tomonlama shartnoma tuziladi.

Bunda, talabaning ishlab berish majburiyati davomiyligi ta’lim yo‘nalishi xususiyatini hisobga olgan holda davlat buyurtmachisi tomonidan belgilanadi.