2025–2026-o‘quv yilida kasb-hunar yo‘nalishi bo‘yicha yakuniy imtihon o‘tkaziladigan maktablar ro‘yxati tasdiqlandi. Jarayon haqida to‘liq ma’lumot

Maktabgacha va maktab ta’limi vazirining 2026-yil 16-martdagi 102-sonli buyrug‘i bilan 2025–2026-o‘quv yili yakunida kasb-hunar yo‘nalishi bo‘yicha yakuniy imtihon bo‘lib o‘tadigan ta’lim muassasalari ro‘yxati tasdiqlandi. Mazkur ro‘yxat hududlar kesimida shakllantirilgan bo‘lib, unda Qoraqalpog‘iston Respublikasi, barcha viloyatlar hamda Toshkent shahri bo‘yicha umumiy o‘rta ta’lim muassasalari keltirilgan.

Buyruqqa ko‘ra, 2025–2026-o‘quv yili yakunida kasbiy ta’lim fani o‘qitilishi yo‘lga qo‘yilgan umumiy o‘rta ta’lim muassasalarining 11-sinflari uchun kasbiy ta’lim fanidan yakuniy imtihon joriy yil 17–20-iyun kunlari amaliy imtihon shaklida o‘tkaziladi.

Mavzuga doir: Endi maktab bitiruvchilariga kasb-hunar sertifikati ham beriladi

Kasb-hunar yo‘nalishi bo‘yicha yakuniy imtihon o‘tkaziladigan maktablar

2025–2026-o‘quv yili yakunida kasb-hunar yo‘nalishi bo‘yicha yakuniy imtihon o‘tkaziladigan ta’lim muassasalari hududlar kesimida quyidagicha belgilangan.

Amaliy imtihon qanday o‘tkaziladi va topshiriqlar qanday bo‘ladi?

Nizomga ko‘ra, bitiruvchi amaliy imtihonda bitta amaliy topshiriq bajaradi. Topshiriqni bajarish uchun har bir kasbning murakkabligi va xususiyatidan kelib chiqib 120 daqiqagacha vaqt ajratiladi. Imtihon savollari va baholash mezonlari har bir kasb turi bo‘yicha vazirlik tomonidan tasdiqlanadi. Imtihon boshlanishidan oldin bitiruvchilar topshiriq shartlari, texnik talablar, baholash mezonlari, vaqt me’yorlari va xavfsizlik qoidalari bilan tanishtiriladi.

Baholash tizimi qanday ishlaydi?

Baholash 100 ballik tizim asosida amalga oshiriladi. Nizomda 86–100 ball “a’lo”, 72–85 ball “yaxshi”, 56–71 ball “qoniqarli”, 0–55 ball esa “qoniqarsiz” deb belgilangan. 56 va undan yuqori ball to‘plagan bitiruvchi amaliy imtihondan o‘tgan hisoblanadi. Imtihon natijalari esa shu kunning o‘zida e’lon qilinadi.

Sertifikat qanday beriladi va qachon topshiriladi?

Kasb-hunar yo‘nalishi bo‘yicha amaliy imtihondan muvaffaqiyatli o‘tgan bitiruvchilarga elektron sertifikat beriladi. Sertifikat shakllantirish uchun o‘quv yili davomida choraklik baholar platformaga kiritib boriladi, amaliy imtihon baholari esa har yili 25-iyunga qadar elektron platformaga joylanadi.

Shundan so‘ng maktab pedagogik kengashi sertifikat berish to‘g‘risida qaror qabul qiladi. Sertifikat avtomatik tarzda shakllanadi va maktab direktori hamda kasbiy ko‘nikmalar markazi direktori tomonidan elektron platforma orqali tasdiqlanadi. Bitiruvchilar sertifikatni bepul yuklab olishlari mumkin.

Sertifikat berish muddatlari qanday?

Muddatlarga ko‘ra, sertifikatlar odatda har yili 30-iyunga qadar, qayta topshirgan bitiruvchilarga esa 10-iyulga qadar beriladi. Sertifikatda bitiruvchining ma’lum bir kasb bo‘yicha 204 soatlik o‘quv dasturini tamomlagani ko‘rsatiladi.