O‘zbekistonda Ramazon hayiti va Navro‘z bayramlari munosabati bilan dam olish kunlari belgilandi. Ayrim toifadagi xodimlar uchun dam olish kunlari ketma-ket uzayadi.
Adliya vazirligi xabariga ko‘ra, bayramlar munosabati bilan quyidagi kunlar dam olish kunlari etib belgilangan:
— 20-mart (juma) – Ramazon hayiti kuni – barcha uchun dam olish kuni;
— 21-mart (shanba) – Navro‘z bayrami kuni – barcha uchun dam olish kuni;
— 22-mart (yakshanba) – dam olish kuni;
— 23-mart (dushanba) — 5 kunlik ish haftasida ishlovchilar uchun dam olish kuni.
Qayd etilishicha, 23-martdagi dam olish kuni ishlanmaydigan bayram kuni dam olish kuniga to‘g‘ri kelgani sababli keyingi ish kuniga ko‘chirilgan. 6 kunlik ish haftasida ishlovchilar uchun esa ushbu kun ish kuni hisoblanadi.
Avvalroq, Uzbekistan Airways Navro‘z va Ramazon Hayiti munosabati bilan ichki qatnovlarga chegirmalar e’lon qilgan edi.
