Navoiy viloyati Qiziltepa tumanidagi maktablardan birining 8-sinf oʻquvchisi Abdusamatova Dilbar ingliz tilidan CEFR B2 darajasini qo‘lga kiritib, xalqaro SAT imtihonida 1430 ball to‘pladi.
Dilbarning Talimxabarlari.uz saytiga ma’lum qilishicha, ingliz tiliga qiziqish 6-sinfdan boshlangan va vaqt oʻtishi bilan bu qiziqish jiddiy maqsadga aylangan.
SAT va CEFR topshirish gʻoyasi esa 8-sinfda boshqa oʻquvchilarning natijalarini koʻrgach paydo boʻlgan. Dilbar fevral oyida CEFR, may oyida esa SAT imtihonini topshirib, yuqori natijalarga erishgan
U SAT imtihoniga 3 oy tayyorlanganini aytadi. Bu jarayonda unga ustozlari Nosirova Nargiza va Zaripova Robiya hamda ularning tavsiya etgan kitoblari yordam bergan.
Eng qiyin qism sifatida u EBRW (Reading and Writing) boʻlimini qayd etadi.
‘‘Reading ballini oshirish uchun eng koʻp xatolar ustida ishladim’’, — deydi u.
Kelajakda u SAT natijasini yanada yaxshilab, Harvard yoki Oxford universitetlaridan biriga hujjat topshirishni maqsad qilgan.
Dilbar tengdoshlariga tajribali ustoz va toʻgʻri manbalar bilan ishlashni tavsiya qiladi.
‘‘Tengdoshlarimga maslahatim shuki: tajribali ustoz va to‘g‘ri manbalardan foydalanishni tavsiya beraman’’,— deydi Dilbar.
Avvalroq, Namanganda 10-sinf o‘quvchisi SAT imtihonida 1590 ballni qo‘lga kiritganligi haqida xabar bergan edik.
