Qozog‘istonda 11-sinf o‘quvchisi Alemger Baypeisov IELTS imtihoniga tayyorlanishga mo‘ljallangan Grader.ai nomli startapni ishga tushirdi. U bu loyihasi uchun 1 600 AQSh dollari miqdorida daromad ko‘rgan.
16 yoshli Alemger Baypeisov, Qozog‘istonning Semey shahridan bo‘lib, hozirda Olmaota shahridagi Nazarboyev nomidagi tabiiy fanlar va matematika intellektual maktabida o‘qimoqda. O‘quvchi yaqinda Grader.ai nomli startapni ishga tushirdi.
Bu platforma IELTS imtihoniga tayyorlanishga mo‘ljallangan sun’iy intellekt dasturi hisoblanadi. Hozirgi vaqtda Grader.ai’da 5000 nafar foydalanuvchi, 1 600 AQSH dollari miqdorida daromad hamda birinchi investitsiyasi mavjud.
Alemger, Nazarbayev Intellektual maktabiga kirganidan so‘ng, texnologiyalar va tadbirkorlikka jiddiy qiziqa boshlagan. Hozirda 11-sinfda o‘qiyotgan Alemger kunduzlari o‘qish bilan, kechalari startap bilan shug‘ullanadi. U, shuningdek, Neura robotexnika jamoasining kapitanidir.
Alemger o‘zining bo‘sh vaqtini sayr qilish va velosport bilan shug‘ullanishga ajratadi. Maktabni tugatgach, u xorijdagi Stenford universitetiga o‘qishga kirishni rejalashtirmoqda.
G‘oya qanday paydo bo‘ldi?
Barchasi shaxsiy muammodan boshlangan. Alemger IELTSga mustaqil tayyorlanayotganida, boshqa ko‘nikmalardan farqli ravishda “Speaking” uchun o‘qituvchi bilan ishlashi zarur edi.
Uning aytishicha, Reading, Listening va Writing bo‘limlarini mustaqil o‘rganish mumkin, lekin Speaking’da o‘qituvchi bilan ishlash kerak. Chunki bu bo‘limda o‘z-o‘zidan fikr-mulohaza olishning imkoni yo‘q.
“Aynan shu nuqtada bo‘shliqni sezdim: butun dunyo bo‘ylab millionlab talabalar IELTS’ga tayyorlanmoqda, ammo ular Speaking’da doimiy fikr-mulohazaga ega emaslar. Shunda Grader.ai’ni ishlab chiqish g‘oyasi tug‘ildi”, — deydi o‘quvchi.
Vaqt o‘tishi bilan, platforma imtihonning barcha 4 bo‘limiga ixtisoslashgan.
Platforma qanday ishlaydi?
Grader.ai – bu faqat o‘quv materiallari joylashgan sayt emas. Unda o‘zining sun’iy intellekt modeli mavjud. U, IELTS imtihonida haqiqiy baholovchi kabi, nutqning ravonligi, grammatika, talaffuz, lug‘at boyligiga qarab baholaydi.
Tizim faqat so‘zlarni emas, balki nutqning o‘zini ham tahlil qiladi: pauzalar, tezlik, intonatsiya va tovushlarning aniq eshitilishi. Haqiqiy baholovchilarning baholari bilan moslik – taxminan 80%.
“Bizning maqsadimiz — baholashni barqaror, arzon va tushunarli qilish”, deydi u.
5000 foydalanuvchi: qanday jalb qilindi?
O‘quvchi loyihasini o‘sishi uchun asosan, TikTok, Instagram va Threads kabi qisqa video formatda ijtimoiy tarmoqlarga joylash orqali amalga oshirgan. U, shuningdek, IELTS tayyorlash bo‘yicha kontent tayyorlovchi blogerlar bilan hamkorlik qilgan.
“Samimiy kontent yaratadigan blogerlar eng samarali kanal bo‘ldi. Hozirda ular biz bilan ishlayapti va bu orqali foydalanuvchilarni jalb qilishda barqaror natijalar ko‘rdik”, — deydi Alemger Baypeisov.
Investitsiyalar va musobaqalar
Ushbu Startap — ishlaydigan prototipi va birinchi foydalanuvchilari bo‘lganida birinchi investitsiyalarni jalb qilgan. IELTS’ga tayyorlashga ixtisoslashgan ta’lim markazi 1000 dollar mablag‘ kiritgan. Bu esa Alemger uchun faqat pul emas, balki bozorda g‘oya muvaffaqiyatli ekanligini ko‘rsatuvchi signal bo‘lgan.
Grader.ai startapi bir nechta musobaqalarda 2-o‘rinni egallagan. KIMEP AI Conference’da — kumush medal, Respublikadagi ilmiy loyihalar musobaqasida esa 10 000 ishtirokchi orasidan 2-o‘rin, Narxoz Startup Arena’da 300 000 tengelik investitsiya sovrini bilan 2-o‘rinni olgan.
Alemger Baypeisov: “Erta boshlash – bu xavf emas, balki afzallik”.
O‘quvchining ta’kidlashicha, Grader.ai jamoasi hozirda “early traction” bosqichida – mahsulot, foydalanuvchilar va daromad mavjud. Keyingi qadam – $25 000 jalb qilish va to‘liq miqyosda kengayishga o‘tishni rejalashtirmoqda.
“Birinchi yildagi maqsadimiz 50 000 foydalanuvchiga yetishish va oylik daromadni $5000–$10 000 oralig‘ida qilish”, — deydi u.
Alemgerning maqsadi faqat o‘qishga kirish emas, balki Stenfordda o‘qish va startaplar, investitsiyalar va texnologiyalarni bir joyda jamlagan Kreml vodiysida o‘sishdir.
Avvalroq, 14 yoshli oʻquvchi yurak kasalliklarini yetti soniyada aniqlaydigan sun’iy intellekt yaratgani haqida xabar bergan edik.
