IIV Akademiyasi 2026/2027-o‘quv yili uchun magistraturaga qabulni boshladi. Nomzodlar hujjatlarini 1-apreldan 1-iyunga qadar elektron shaklda topshirishi mumkin.
Qabul uchta yo‘nalish bo‘yicha amalga oshiriladi:
- tashkiliy-strategik boshqaruv
- tashkiliy-taktik boshqaruv
- ilmiy-pedagogik faoliyat
Tashkiliy-strategik boshqaruv
Mazkur yo‘nalishda o‘qish uchun nomzodlar bakalavr darajasi yoki diplomli mutaxassis malakasimalakasi hamda qonunchilik hujjatlariga muvofiq “tashkiliy-taktik boshqaruv” mutaxassisligi diplomiga tenglashtirilgan (muqaddam faoliyat ko‘rsatgan magistratura, Oliy akademik kurslar yoki Rahbar kadrlarni tayyorlash fakultetini tamomlagan) diplom, shuningdek “podpolkovnik” maxsus unvoniga ega bo‘lishi lozim.
Shuningdek, so‘nggi 1 yil davomida yuqori rahbarlik lavozimlarida ishlayotgan xodimlarning hujjatlari qabul qilinadi (bo‘lim yoki boshqarma boshliqlari, IIB rahbarlari, jazoni ijro etish muassasalari boshliqlari va boshqalar).
Tashkiliy-taktik boshqaruv
Bu yo‘nalish uchun bakalavr yoki diplomli mutaxassis darajasi hamda kamida “mayor” maxsus unvoni talab etiladi.
Nomzodlar so‘nggi 1 yil davomida o‘rta va yuqori lavozimlarda faoliyat yuritayotgan bo‘lishi kerak (bosh mutaxassislar, tergovchilar, bo‘linma boshliqlari, IIB rahbar o‘rinbosarlari va boshqalar).
Ilmiy-pedagogik faoliyat
Mazkur yo‘nalishda oliy yuridik ma’lumot va kamida 2 yillik xizmat staji talab etiladi.
Ayrim imtiyozlar mavjud:
- Akademiyani imtiyozli diplom bilan bitirgan va 2 yil xizmat qilganlar tanlovsiz qabul qilinadi;
- maxsus stipendiya sohiblari bo‘lgan iqtidorli bitiruvchilar esa xizmat stajisiz ham tanlovsiz qabul qilinishi mumkin.
Qabul tartibi
Hujjatlar faqat elektron shaklda qabul qilinadi. Nomzodlar:
magistr.akadmvd.uz sayti orqali ro‘yxatdan o‘tadi;
Akademiya boshlig‘i nomiga yozilgan bildirgining imzolangan nusxasini yuklaydi.
Qabul jarayoni uch bosqichda o‘tkaziladi:
- Hujjatlarni ko‘rib chiqish
- Maxsus kasbiy tanlov (yozma ish va diagnostika)
- Yakuniy suhbat
Hujjatlar 2026-yil 1-apreldan 1-iyungacha qabul qilinadi.
Ma’lumot uchun: IIV Moliya va moddiy-texnika ta’minoti departamenti, Idoraviy hamkorlik bosh boshqarmasi, Shaxsiy xavfsizlik bosh boshqarmasi, Xalqaro hamkorlik boshqarmasi, Tibbiyot boshqarmasi, Harbiy-safarbarlik boshqarmasi, Axborot xizmati, Interpolning O‘zbekiston Respublikasidagi Milliy markaziy byurosi, Nazorat-taftish inspeksiyasi, axborot texnologiyalarini joriy etish bo‘linmalari xodimlari ichki ishlar organlarining rahbarlik lavozimlariga tayinlanishi uchun magistraturaning “tashkiliy-taktik boshqaruv” va “tashkiliy-strategik boshqaruv” mutaxassisliklarida o‘qishi talab etilmaydi.
