Maktab oshxonasiga qanday gigiyenik talablar qo‘yilgan?

Sanepidqo’mita Toshkent shahar boshqarmasi maktab oshxonasiga qo’yilgan gigiyenik talablar haqida ma’lumot berdi.

Qo‘yiladigan talablar:

1. Xonalar va jihozlar talablari:

• oshxona xonalari toza, yorug‘ va shamollatiladigan bo‘lishi kerak;

• devorlar 1,7 m balandlikkacha yuviladigan material bilan qoplangan bo‘lishi kerak;

• pol sirpanchiq bo‘lmagan materialdan bo‘lishi va muntazam yuvib-dezinfeksiya qilinishi kerak.

2. Ovqat tayyorlash talablari:

• xom mahsulot bilan tayyor ovqat bir xil joyda ishlanmaydi (kross-kontaminatsiya oldini olish);

• pichoqlar, doskalar rang bo‘yicha ajratilgan bo‘lishi lozim.

3. Idish-tovoqlar gigiyenasi:

Idishlar uch pog‘onali yuvish tizimida tozalanadi:

1. sovunli suv;

2. issiq suv;

3. dezinfeksiya (maxsus eritma).

Choynak, piyola va qoshiq alohida yuviladi. Bir martalik idishlar qayta ishlatilmaydi.

4. Sanitariya holati:

• har kuni to‘liq umumiy tozalash, haftada 1 marta chuqur dezinfeksiya qilinadi;

• chiqindilar qopli chelaklarda saqlanadi va kuniga kamida 1–2 marta olib chiqiladi;

• zararkunandalarga qarshi dezinfeksiya, deratizatsiya rejali ravishda o‘tkaziladi.

5. Xodimlarga qo‘yiladigan talablar:

• xodimlar maxsus kiyim (xalat, bosh kiyim, fartuk)da ishlashi shart;

• ish boshlashdan oldin tibbiy ko‘rikdan o‘tgan bo‘lishi kerak;

• qo‘llarni yuvish uchun maxsus joylar, sovun, dezinfektor bo‘lishi zarur;

• xodimlar shaxsiy gigiyena qoidalariga rioya qilishi shart.

6. Mahsulotlarni qabul qilish va saqlash:

• mahsulotlar sifat hujjatlari (sertifikat, sifat guvohnomasi) bilan tasdiqlangan bo‘lishi shart;

• muzlatkich va kameralar harorati nazorat qilinadi.

Avvalroq, maktab oshxonalarida bir qator mahsulotlarning tayyorlanishi va sotilishi taqiqlangani haqida xabar bergan edik.