Shohruh Yusupov ismli yigit o’zining instagramdagi sahifasiga uni o’qishga kirish uchun o’qitgan ustoziga mashina sovg’a qilganligi haqida video post joyladi.
“Ko’p yillardan beri ukalarim bilan niyat qilgan orzumizga bugun yetishdik. Ko’p yillar oldin menga hech qanday tanish yoki yaqin joyi bo’lmagan bir o’qituvchi “men seni matematika va fizikadan tekinga o’qitaman va o’z kuching bilan o’qishga kirasan” degan va 3 yil davomida o’qitdi. Vaqt o’tib, men grant asosida o’qishga kirdim. Bundan tashqari opam, singlim va ikkita ukamni ham ustoz o’qitdi. Mana bugun ustozga kichkinagina sovg’amiz bor, lekin ularning biz uchun qilgan mehnatlari oldida bu juda ham kamlik qiladi”, – deydi Shohruh Yusupov.
Ustoz Utkir Haqberdiyev Samarqand viloyati Oqdaryo tumanida fizika fanidan abituriyentlarni tayyorlab kelmoqda.
