Ijtimoiy tarmoqlarda maktab o‘quvchisining sinf xonasida pichoqni namoyishkorona o‘ynagani videosi tarqaldi.
Mazkur holat Toshkent shahri Mirzo Ulug‘bek tumanidagi 187-maktabda sodir bo‘lgani aytilmoqda.
Toshkent shahar maktabgacha va maktab ta’limi boshqarmasi tomonidan bildirilgan rasmiy munosabatga ko‘ra, maktabning 11-sinf o’quvchisi o’rtoqlariga maqtanish maqsadida pichoq ko’rinishidagi o’tmas jism (o’yinchoq) olib kelgan va tanaffus vaqtida atrofidagilarga ko’rsatib maqtangan.
“O‘quvchi va uning ota-onasi bilan mahalla inspektori maktab rahbariyati va Milliy gvardiya xodimlari ishtirokida sodir etilgan xatti-harakati yuzasidan profilaktik tushuntirish ishlari olib borilgan. Voyaga yetmagan o’quvchining ota-onasiga nisbatan MJ tKning 47-moddasiga asosan jarima jazosi qo’llanilgan.
Ayni vaqtda o’quvchi o’zining xatti-harakatiga nisbatan ko’rilgan choradan noroziligini maktab ma’muriyati va Milliy gvardiya xodimiga bildirgan hamda videolavhani ijtimoiy tarmoqqa joylashtirgan”, – deyiladi boshqarma munosabatida.
Ta’kidlash lozim, oldinroq Yunusobod tumanidagi 235-maktab o‘quvchilari sinfda karta o‘ynab o‘tirgani videosi tarqalgani xabar berilgandi.