Toronto universiteti Shvars Reysman texnologiya va jamiyat instituti sun’iy intellekt texnologiyalarini inson qadriyatlariga moslashtirish maqsadida tadqiqot va ta’limni rivojlantirmoqda. Toronto universiteti sun’iy intellekt sohasida, xususan, Jeffri Xinton va uning shogirdlarining chuqur o‘rganishdagi ishlari orqali yetakchi o‘ringa ega. Bugungi kunda sun’iy intellekt ko‘plab sohalarda keng qo‘llanilmoqda va tezkor o‘sish bilan birga, uni tartibga solishga ehtiyoj oshib bormoqda.
Shvars Reysman instituti fanlararo tadqiqotlar va ta’lim dasturlarini rivojlantirish orqali sun’iy intellektni axloqiy va jamiyat manfaatlariga moslashtirish jarayonini qo‘llab-quvvatlaydi. Institut direktori Devid Li bu borada shunday deydi: “Bizga sun’iy intellektni boshqarish va tartibga solishning to‘g‘ri yo‘lini topish uchun ko‘plab odamlar kerak. Muhimi, biz hozirdan harakat qilamiz”.
Fanlararo hamkorlik va axloqiy standartlarni qo’llab-quvvatlash
Institut sun’iy intellektning jamiyatga ta’sirini o‘rganish va nazorat qilish maqsadida kompyuter, falsafa, psixologiya, huquq va davlat siyosati kabi turli sohalardan mutaxassislarni birlashtirmoqda. Shuningdek, taniqli sun’iy intellekt xavfsizligi bo‘yicha ekspertlar Rojer Grosse va Devid Duvenaudni texnologiya va jamiyat kafedralari sifatida tayinlash orqali jamoatchilikni sun’iy intellekt va texnologiyalarning axloqiy standartlari bilan tanishtirishga intilmoqda.
Toronto universiteti sun’iy intellektning axloqiy tamoyillarini chuqurroq o‘rgatish maqsadida Etika ta’limi tashabbusini amalga oshirgan bo‘lib, bu tashabbus orqali talabalar texnologiyani insoniy qadriyatlar bilan muvofiq holda ishlab chiqish zaruriyatini o‘zlashtiradilar.
“Biz o‘quvchilarda axloqiy sezgirlikni rivojlantirishni istaymiz, chunki ular ishchi kuchiga kirganda birinchi qatorda bo‘lishadi. Axloqiy mulohazalar dizayn tamoyillarining ajralmas qismiga aylanishi kerak”, — dedi professor Sheyla Maklreyt
2020-yilda boshlangan bu tashabbus 2023/24 o‘quv yilida yanada kengayib, kompyuter fanlaridan tashqari boshqa kurslarga ham tatbiq etildi. 8000 nafardan ortiq talaba informatika kurslariga, shuningdek, axloqiy tamoyillar bo‘yicha boshqa yo‘nalishlardagi kurslarga jalb qilindi.
Toronto universiteti Raqamli maxfiylik va maxfiylikni tartibga solish bo‘yicha yangi kursni joriy etmoqda, bu kurs huquq va muhandislik talabalarini sun’iy intellekt texnologiyalari va ularning huquqiy oqibatlari haqida birgalikda muhokama qilish uchun birlashtiradi.
Institut direktori Devid Li ushbu sa’y-harakatlarning asosiy maqsadi sifatida sun’iy intellekt texnologiyalarini insoniyat manfaati uchun xavfsiz va mos holda rivojlantirishni ko‘rsatadi:
“Texnologiya jamiyat bo‘ylab kengayib borayotganini hisobga olsak, uni umumiy tizimlardan ajratib o‘qitish mantiqqa to‘g‘ri kelmaydi. Muvaffaqiyatning mezoni sun’iy intellekt bilan yaxshiroq yashashimizni ta’minlovchi sog‘lom ekotizimni yaratishdir.”
