1-may sanasidan 5 yil ish stajiga ega xotin-qizlarga tavsiyanoma berish boshlanadi.
Qonunchilikka ko‘ra, mutaxassisligi bo‘yicha kamida 5 yil mehnat stajiga ega, biroq oliy ma’lumoti bo‘lmagan xotin-qizlar davlat OTMlariga to‘lov-kontrakt asosida qabul qilinishi uchun Oila va xotin-qizlar qo‘mitasining tavsiyanomasini olishlari mumkin.
Tavsiyanoma olish uchun xotin-qizlar.uz platformasi orqali elektron ariza yuboriladi. Arizada doimiy yashash yoki vaqtincha turgan joyi bo‘yicha tegishli tuman (shahar) oila va xotin-qizlar bo‘limi tanlanadi.
Imtiyoz olmoqchi bo’lgan talabgorlarning ish staji bo’yicha ma’lumotlari my.mehnat.uz (Yagona milliy mehnat tizimi) orqali tekshiriladi. Bundan tashqari, o‘rta maxsus yoki kasb-hunar ta’limi diplomi diplom.edu.uz sayti orqali tasdiqlangan bo‘lishi lozim.
Muhim eslatma! Tavsiyanoma olgan xotin-qizlar ham davlat OTMlariga kirish uchun test sinovlarida ishtirok etadi. Faqat ular umumiy tartibda emas, balki imtiyoz uchun ajratilgan alohida 500 ta kvota doirasida o‘zaro kurashadi.
