Uzoq vaqt davomida har kuni kitob o‘qisa nima bo‘lishi haqida o‘ylab ko‘rganmisiz? Adabiyotga bo‘lgan muhabbat turli xil oqibatlarga olib kelishini tan olish kerak bo‘ladi — ular orasida qaramlik, xavotir yoki suhbatdoshlarni tanlashda o‘ta talabchanlik ham bor.
Darhaqiqat, o‘qish kundalik hayotdagi eng o‘ziga tortuvchi odatlardan biridir, eng qizig‘i esa bu muhabbat istalgan yoshda paydo bo‘lishi mumkin. Biz kitoblarga bo‘lgan bog‘liqlik nimaga olib kelishini o‘ylab, natijada butun bir “tashxislar ro‘yxati”ga duch keldik.
Qaramlik
Ehtiyot bo‘ling, bu jarayon odatga aylanadi! Agar siz har kuni yaxshi kitoblar o‘qisangiz, albatta bu jarayonga berilib ketasiz. Tez orada o‘qish odatga, keyin esa ehtiyojga aylanadi. Natijada metroda, uxlashdan oldin yoki tushlik paytida siz ijtimoiy tarmoqlar yoki ishdagi g‘iybatlardan ko‘ra navbatdagi badiiy hikoyani afzal ko‘rasiz. Kitob o‘qimasangiz, zerikib qolasiz. Bu yaxshimi yoki yomonmi — o‘zingiz hal qiling.
Atrofdagilarga nisbatan tanlab munosabatda bo‘lish
Ma’lumki, kitob — eng yaxshi suhbatdosh. Bundan tashqari, gumanitar bilimlar va keng dunyoqarash har qanday suhbatni davom ettirishga yordam beradi. Biroq har kuni kitob o‘qiy boshlasangiz, do‘stlaringizni ham ongliroq tanlay boshlaysiz. Sezdirmaygina, siz uchun inson “Urush va tinchlik”ni o‘qiganmi, Kamyu va Sartr ijodi bilan tanishmi, sifatli non-fikshnni soxta ilmiy adabiyotdan ajrata oladimi — muhim bo‘lib qoladi. Ehtimol, muloqot doirangiz o‘zgaradi, ammo bu o‘zgarish albatta ijobiy tomonga bo‘ladi.
E’tiborning chalg‘ishi
Kitobga berilib ketib, kerakli bekatdan o‘tib ketgan odamlar haqidagi voqealarni eshitganmisiz? Ushbu matn muallifi elektr poyezdda bir necha bekat ortiqcha yurib yuborishi yoki metro halqa liniyasida to‘liq aylanib chiqishi mumkin. O‘qishga berilib, ichilmay qolgan qahva yoki tugallanmagan nonushta yoddan chiqadi, jamoat transportida kerakli buyum qolib ketadi va eng muhimi — kun davomida yig‘ilib qolgan muammolar unutiladi! Oqibatlar ijobiy ham, salbiy ham bo‘lishi mumkin, ammo mayda noqulayliklar zavqdan voz kechish uchun sabab emas, to‘g‘rimi?
Xavotir
O‘qishni xohlagan barcha kitoblarni o‘qib tugatish mutlaqo imkonsiz. Qanchalik ko‘p o‘qishga qiziqsangiz, rejalaringiz ro‘yxati shunchalik uzayib boradi. Tez orada sizni bir narsa tashvishga sola boshlaydi: bu ro‘yxat o‘qilayotganidan tezroq to‘lib bormoqda. Ammo agar vaziyatni o‘zgartirib bo‘lmasa, uni qabul qilish mumkin: eng avvalo sizni qiziqtirgan asarlarni o‘qing, balki ayrim kitoblar vaqt o‘tib o‘z-o‘zidan “chiqib ketar”.
“Plyushkin sindromi”
O‘qishning yana bir yashirin tomoni — to‘plashga moyillik. Hatto elektron kitoblarning ashaddiy muxlisi bo‘lsangiz ham, baribir bir-ikki qog‘oz kitob sotib olish istagi paydo bo‘ladi. Esda tuting, bu xavotirli belgi! Sezdirmaygina, oldingizda katta kitob javoni sotib olish zarurati paydo bo‘ladi. To‘g‘ri, u interyerni ham chiroyli bezashi mumkin.
P.S. Agar bu hazilomuz matn sizni biroz qo‘rqitgan bo‘lsa, bir tasavvur qiling: agar umuman kitob o‘qishni tashlasangiz, nima bo‘ladi?
