AQSH ning Viskonsin shtati Medison shahridagi Abundant Life xristian maktabida 15 yoshli qiz tomonidan otishma sodir etildi. Bu haqda CNN xabar berdi.
Hodisa natijasida bir o‘quvchi, bir o‘qituvchi va otishmani sodir etgan qiz halok bo‘ldi. Politsiya gumonlanuvchining o‘z joniga qasd qilganini ma’lum qildi. Shuningdek, 6 kishi jarohat olgan, ulardan ikki nafari og‘ir ahvolda.
Favqulodda vaziyatga javob berish bo‘yicha vaqt jadvali:
- 10:57 – 2-sinf o‘quvchisi 911 raqamiga qo‘ng‘iroq qilib, maktabda otishma sodir etilganini xabar qiladi.
- 11:00 – Dane okrugi sherifining o‘rinbosari birinchi bo‘lib hodisa joyiga yetib keladi.
- 11:00:24 – Medison politsiyasining birinchi xodimi yetib kelib, maktabga kiradi.
- 11:05 – Politsiya xodimlari otishmani sodir etgan shaxsni zararsizlantirgani va qurolni topgani haqida xabar beradi.
- 11:05 – Yong‘in xavfsizligi bo‘limi xodimlari yetib keladi va jabrlanganlarga yordam ko‘rsatishni boshlaydi.
- 11:14 – Politsiya maktabni to‘liq tekshirishga kirishadi.
- 11:23 – Portlovchi moddalarni aniqlash uchun itlar olib kelinadi.
- 11:26 – Maktabda davolanayotgan jarohatlanganlar shifoxonalarga ko‘chiriladi.
Otishma tafsilotlari:
Abundant Life xristian maktabida taxminan 420 o‘quvchi ta’lim oladi. Ushbu hodisada 15 yoshli gumonlanuvchi bir o‘quvchi va o‘qituvchini otib o‘ldirgan, so‘ngra o‘z joniga qasd qilgan.
Medison politsiyasi boshlig‘i Shon Barns gumonlanuvchining ota-onasini ayblashga asos yo‘qligini ta’kidlagan va ular politsiya bilan to‘liq hamkorlik qilayotganini bildirgan.
Bundan tashqari, so‘nggi yillarda AQSHda maktabda otishmalar sodir etgan bolalarning ota-onalari ham javobgarlikka tortilmoqda. Misol uchun:
– 2021-yil: Michigan shtatidagi maktabda otishma uyushtirgan Itanning ota-onasi 10 yildan 15 yilgacha qamoq jazosiga hukm qilingan;
– 2024-yil: Jorjiya shtatida ommaviy otishma uyushtirgan 14 yoshli Kolt Greyning otasiga 29 ta ayblov qo‘yilgan.
