“Milliy tiklanish” fraksiyasi rahbari Alisher Qodirov navbatdagi saylovoldi dasturida maktablarda yettinchi sinfdan boshlab bolalarni undagi qobiliyatiga qarab tabaqalashtirib o‘qitish taklifini ilgari surmoqchi.
Uning fikriga ko‘ra, bolalar 7- sinfgacha umumiy, fundamental bilimlarni olganidan keyin, unda ilmga bo‘lgan salohiyat, sportchilik qobiliyati, tadbirkorlikka qiziqish va boshqalar ko‘rinib qoladi.
Ko‘rinib turibdiki, “Milliy tiklanish” partiyasi maktablarda o‘quvchilarni ko‘proq ixtisoslashtirgan holda o‘qitish tarafdori bo‘lmoqda. Ya’ni bola barcha sohalarni emas, o‘zi mutaxassis bo‘lib ishlamoqchi bo‘lgan sohasiga ko‘proq vaqt ajratishi taklif etilmoqda.
“Bundan tashqari, bugun maktablarimiz oliy ta’limni hayot-mamot masalasi sifatida bolaning ongiga singdiryapti. Vaholanki, baxtli yashash uchun oliy ta’lim diplomi talab qilinmaydi”,– deya fikr bildirdi Qodirov.
