Qishki oʻqishni koʻchirish uchun arizalar qabuli 20-dekabrdan boshlanadi.
Qishki qabul jarayonlarida oʻqishni koʻchirish hech qanday maxsus imtihonlarsiz oʻtkaziladi. Taqdim etilgan hujjatlar vazirlik komissiyasi tomonidan koʻrib chiqilib, shunga asosan xulosa beriladi.
Oʻqishni koʻchirmoqchi boʻlgan talabalar tomonidan hududiy ishchi guruhlarga quyidagi hujjatlar 20-yanvargacha oflayn shaklda taqdim etilishi kerak:
– oʻqishni koʻchirish boʻyicha ariza (ariza blankasi hududiy ishchi guruhi tomonidan beriladi va talaba tomonidan joyida toʻldiriladi);
– talabaning reyting daftarchasi yoki belgilangan shakldagi akademik maʼlumotnoma yoki transkript nusxalari (bittasi boʻlsa yetarli);
– pasport nusxasi;
– uzrli sabablarni asoslovchi tegishli hujjatlar.
Arizalar 20-yanvargacha qabul qilinsa, oʻqishini koʻchirish boʻyicha arizani koʻrib chiqib, qaror qabul qilish — har yili 25-yanvardan 15-fevralga qadar amalga oshiriladi.
Qishki perevodda arizalar onlayn shaklda sayt orqali toʻldirilmaydi. Kerakli hujjatlar har bir OTMda tashkil etilgan ishchi guruhga talaba yoki uning yaqin qarindoshlari tomonidan shaxsan topshirilishi shart.
Quyidagi sabablarga koʻra, oʻqishni qishki “perevod” orqali koʻchirish mumkin:
– boshqa viloyatga turmushga chiqqani sababli oʻsha hududga oʻqishini koʻchirishi (oʻzining yoʻnalishiga yoki mos va turdosh yoʻnalishga koʻchirishi, xoxlasa taʼlim shaklini ham oʻzgartirib koʻchirishi ham mumkin);
– ota-onasi yoki turmush oʻrtogʻi davlat xizmatchisi boʻlib, ularning doimiy ish koyi boshqa viloyatga koʻchirilgani sababli (bunda ham yuqoridagi singari shakllarda koʻchirish mumkin);
– faqatgina davlat oliygohidan boshqa davlat oliygohiga uzrli sababga koʻra, tegishli tartibda koʻchira olish.
Quyidagi holatlarda qishki “perevod”ga ruxsat berilmaydi:
– ichki perevod (bir oliygoh ichida taʼlim yoʻnalishini yoki taʼlim shaklini oʻzgartirish);
– bir hudud doirasida boshqa oliygohga koʻchirish (masalan bir viloyatdagi boshqa oliygohga oʻqishni koʻchirish);
– xorijiy yoki respublika hududidagi ularning filiallaridan oʻqishni koʻchirish;
– davlat oliygohlaridan xususiy oliygohlarga oʻqishni koʻchirish;
– xususiy oliygohlardan davlat oliygohlariga oʻqishni koʻchirish;
– xususiy oliygohlar oʻrtasida oʻzaro oʻqishni koʻchirish harakatlari;
– xususiy oliygoh bilan bogʻliq har qanday oʻqishni koʻchirish jarayonlari;
– xorijdan davlat yoki xususiy oliygohlarga oʻqishni koʻchirish.
