Берлиннинг Helmholtz-Zentrum Berlin (HZB) университети томонидан бакалавр ва магистратура босқичи талабалари учун 8 ҳафталик ёзги тадқиқот дастури эълон қилинди.
Дастур физика, кимё, материалшунослик, структуравий биология, математика, атроф-муҳит фанлари, муҳандислик ҳамда шунга тегишли соҳаларда ўқиётган талабалар учун мўлжалланган бўлиб, бунда дастурга қабул қилинган иштирокчилар олимлар билан яқин ҳамкорликда ўзларининг илмий лойиҳалари устида ишлаш, Берлин-Ванси ёки Берлин-Адлершофдаги HZB кампусларида жойлашган лабораторияларида ёки экспериментал майдонларида тадқиқот гуруҳларнинг кундалик ишларида иштирок этиш имкониятига эга бўлишади.
Дастур 2026 йил 6 июлдан 28 августгача давом этади ҳамда иштирокчилар дастур якунида тадқиқот юзасидан тақдимот қилишлари керак бўлади.
Дастурга қабул жараёни 2025 йил 14 декабргача давом этади.
Олиб бориладиган тадқиқот жараёни билан ушбу ҳавола орқали батафсил танишиб чиқиш мумкин.
Мақбуллик шартлари
Дастурда иштирок этиш учун номзодлар қуйидаги талабларга жавоб бериши керак:
– барча давлат фуқаролари қатнаша оладилар;
– номзод физика, кимё, материалшунослик, структурал биология, муҳандислик, ҳаёт ёки атроф-муҳит фанлари ёки шунга тегишли йўналишларда бакалавр ёки магистратура талабаси бўлиши (PhD эмас);
– университетда тўлиқ штат асосида камида икки йилни ўқиб тугатган бўлиши, яъни камида иккинчи курсни тугатган бўлиши керак;
– инглиз тилини яхши билиши, немис тилини ҳам билиши устунлик беради;
– дастурга қабул қилинганлар HZB да амалиёт тугагунча ўзлари ўқиётган университет талабалар сафида қолишлари шарт (2026 йил 6 июлдан 28 августгача);
– ариза топшириш муддати тугагунга қадар битта тавсиянома топширишлари керак.
Дастур талаблари билан ушбу ҳавола орқали батафсил танишиб чиқиш мумкин.
Фойдали томонлари
Дастурга қабул қилинганлар қуйидаги имтиёзларга эга бўлишади:
– дастурга қабул қилинганлар билан 8 ҳафталик амалиёт шартномаси тузилади;
– Берлин ва Потсдамдаги университет талабалари учун €1000, Германиядан ташқари бошқа давлат университет талабалари учун €1900 маблағ ажратилади;
– бориб-келиш харажатлари учун — €800.
Ҳужжат топшириш
Ҳужжат топширишда қуйидагилар талаб қилинади:
– 2 бетдан ошмаган CV (Таbular форматда);
– университетда олинган энг охирги баҳолари ва фанлари таржимаси;
– талаба эканлигини тасдиқловчи маълумотнома;
– паспорт нусхаси (инглиз тилида).
Эслатма: ушбу ҳужжатни юклаб олиб, уни университетдан тасдиқлатиб топшириш керак.
Дастурга ҳужжат топшириш бўйича йўриқномалар билан ушбу ҳавола орқали батафсил танишиб чиқиш мумкин.
Дастурга ушбу ҳавола орқали ариза топшириш мумкин.
