АҚШнинг Пенсилвания штатида жойлашган Пенсилвания университетининг Wharton бизнес мактаби ҳар йили дунё бўйлаб мактаб ўқувчилари ва уларнинг ўқитувчилари учун Wharton Global High School Investment Competition танловини ташкил этади.
Мазкур танлов мутлақо бепул бўлиб, унда иштирокчилар Wharton Investment Simulator (WInS) платформаси орқали виртуал сармоя киритиш жараёнида тажриба орттирадилар. Бу платформа таълим ва молия соҳаси учун дунёдаги етакчи биржа бозорини симуляция қилувчи тизимлардан биридир.
Кимлар қатнашиши мумкин?
Танловда 14–18 ёш оралиғидаги 9–12-синф ўқувчилари 4–7 кишилик жамоа шаклида қатнашади. Ҳар бир жамоада уларни бошқариб, рағбатлантириб турувчи ва рўйхатдан ўтказувчи битта етакчи ўқитувчи бўлиши шарт. Ўқувчилар фақат битта жамоа таркибида қатнашиши мумкин.
Уйда таълим олувчи ёки шахсий ўқитувчи билан шуғулланадиган номзодлар ҳам махсус ёзма мурожаат орқали дастурга қўшилишлари мумкин.
Танлов жараёни
Wharton Investment Simulator (WInS) платформасида танлов 2025 йил 30 сентябрдан 6 декабргача давом этади.Дастур доирасида ҳар бир жамоага $100,000 виртуал пул портфолиосини бошқариш вазифаси юкланади.
– сармоя стратегиясини ишлаб чиқиш,
– компания ва тармоқларни таҳлил қилиш,
– жамоавий ҳамкорлик ва етакчилик,
– мулоқот ва қарор қабул қилиш кўникмаларини ривожлантириш имконига эга бўладилар.
Танловга жами 11 ҳафта ажратилган бўлиб, шундан 10 ҳафтаси трейдинг, қўшимча бир ҳафта эса якуний ҳисоботни тақдим этиш учун ажратилган. Ушбу вақтни қандай тақсимлаш, лойиҳа давомида қанчадан вақт ажратиш жамоанинг ўзига, тажрибаси ва қобилиятига боғлиқ.
Рўйхатдан ўтиш тартиби
Етакчи ўқитувчилар жамоаларини 2025 йил 17 июндан 13 сентябргача рўйхатдан ўтказишлари мумкин. Бу жараён икки босқичда амалга оширилади:
Етакчи ўқитувчи шахсий кабинет яратади ва мактаб маълумотларини киритади.
WInS платформасида жамоани рўйхатдан ўтказади ва сардорга логин-паролни тақдим этади.
Бир ўқитувчи энг кўпи билан 5 та жамоага раҳбарлик қилиши мумкин.
Дастур ҳақида ушбу ҳавола орқали батафсил маълумот олиш мумкин.
Фойдали жиҳатлари
Барча ярим финал ва финал иштирокчилари сертификат билан тақдирланади;
Финалга чиққан жамоадаги ҳар бир иштирокчи Future of the Business World, Essentials of Leadership, Moneyball Academy: Training Camp FLEX ёки Moneyball Academy: Training Camp ёзги онлайн дастурларида қатнашиш имконини қўлга киритади;
Финал босқичига етиб келган 10 та жамоа аъзолари Ундерстандинг Ёур Моней курсида бепул таълим олишади;
Танловга бизнес таълими бўйича жаҳон етакчиси The Wharton School мезбонлик қилади. Финалга чиққан жамоалар АҚШнинг Пенсилвания штатида жойлашган ушбу мактабга ташриф буюриш имконига эга бўлади;
Иштирокчилар қимматли қоғозлар ва стратегияларнинг қизиқарли дунёси билан танишиш, молиявий кўникмаларни ўзлаштириш, жамоа билан ишлаш, етакчилик ва мулоқот қобилиятларини ривожлантириш, бутун дунё жамоалари билан рақобатлашиш имкониятини қўлга киритади.
Эслатма: Танловнинг финал босқичи яъни, Global Finale in Philadelphia га чиққан жамоанинг Филаделфияга бориш-келиш, яшаш ва бошқа харажатлари дастур томонидан қопланмайди. Лекин улар Филаделфияга бора олмаган тақдирда финал босқичида видеоконференция орқали онлайн қатнашишлари мумкин.
Дастурнинг фойдали жиҳатлари ҳақида ушбу ҳавола орқали тўлиқ маълумотга эга бўлиш мумкин.
Ҳужжат топшириш
Танловга рўйхатдан ўтиш жараёни икки босқичда бўлиб ўтади:
1. Биринчи босқичда етакчи ўқитувчи ўзи рўйхатдан ўтиши керак бўлади. Бу жараён қуйидагича амалга оширилади:
Етакчи маслаҳатчи шахсий кабинети учун фойдаланувчи номи ва калит сўз ўйлаб топинг;
Иштирокчиларнинг мактаб электрон манзили ва қўшимча равишда танлов хабарлари жўнатиладиган яна бир электрон манзилни кўрсатинг;
Мактаб номи ва веб саҳифаси, шунингдек, мактаб директорининг исм-фамилияси ҳамда манзилини киритинг;
Жамоа учун очилган кабинетни ҳавола қилинг (5 тагача).
2. Иккинчи босқичда етакчи ўқитувчи Wharton Investment Simulator (WInS) трейдинг платформасида жамоа аъзоларини рўйхатдан ўтказади. Бу жараён 2025 йил 17 июндан 13 сентябргача давом этади ва қуйидагича амалга оширилади:
– юқори ўнг бурчакдаги «Админ» сўзининг устига босинг;
– «Инструcтор Админстратион» сўзининг устига босинг;
– «Адд Теам» тугмасининг устига босинг;
– фойдаланувчи номини киритинг. Жамоа сардорининг исм-фамилиясини, электрон манзили ва мактабни битирадиган йилини киритинг. Эслатма! Қолган жамоа аъзоларининг маълумотлари 2025 йил 18 октябрьдан сўнг киритилади;
– «Субмит» тугмасини босинг, сўнг платформа автоматик равишда калит сўзни чиқариб беради;
– фойдаланувчи номи ва калит сўзни жамоа сардорларига етказинг;
– ҳар бир рўйхатдан ўтиш жараёни шу кетма-кетликка амал қилинади. Бир етакчи ўқитувчи 5 тагача жамоани бошқариши мумкин;
Жамоалар 2025 йил 13 сентябрь Ўзбекистон вақти билан соат 15:00дан кечикмаган ҳолда рўйхатдан ўтказилиши шарт.
Эслатма: Ўқувчилар ўзлари ариза топширишлари мумкин эмас, акс ҳолда танловга қатнашиш учун рухсат берилмайди. Ўтган йили танловда қатнашган жамоалар бу йил учун қайтадан ариза топширишлари керак бўлади. Ариза топшириш давомида барча сўралган қисмлар тўлдирилиши керак, бадал пули мавжуд эмас. Шахсий кабинет ҳар бир жамоа аъзоси учун алоҳида очилмайди, бутун жамоа бир кабинет орқали қатнашади.
