Namangan viloyati, Uychi tumani 40-umumtaʼlim maktabining 4-sinf oʻquvchisi Mirzaakbarova Mumtozbegim ingliz tilidan CEFR B2 darajali sertifikatni qoʻlga kiritdi.
U chet tilini bilish darajasini aniqlash test sinovining qismlaridan quyidagi natijalarni qayd etdi:
- Listening (tinglab tushunish) — 57;
- Reading (oʻqish) — 45;
- Writing (yozish) — 50;
- Speaking (gapirish) — 52.
Mumtozbegimning onasi Boqieva Nargiza Talimxabarlari.uz saytiga ma’lum qilishicha, farzandida ingliz tiliga qiziqish 1-sinfni bitirgach boshlangan.
U avvalgi yilgi imtihonda 48 ball to‘plagan bo‘lsa, bu yil umumiy 51 ball natija qayd etgan. Imtihon natijasi e’lon qilingach, uni ko‘rib onasi juda hayajonlanganini aytadi.
“His-tuyg‘ularim juda hayajonli bo‘ldi. Kichkina qiz shunchalik natijaga erishadimi, deb o‘yladim”, — deydi Mumtozbegimning onasi.
Onasining aytishicha, Mumtozbegimning ushbu natijaga erishishida eng katta sabab uning qiziqishi va oʻqituvchilarining qoʻllab-quvvatlashi boʻlgan.
“Bolalarni yoshligidanoq qoʻshimcha mashgʻulotlarga berish kerak. Baʼzilar bu yoshda bola faqat oʻynashi kerak, deb oʻylaydi. Lekin men bunga qoʻshilmayman. Bolalar yoshligidan oʻqishga yoʻnaltirilsa, albatta natija boʻladi”, — deya boshqa ota-onalarga tavsiya beradi Mumtozbegimning onasi.
Avvalroq, Samarqandda ham 4-sinf oʻquvchisi Chet tilini bilish darajasi boʻyicha B2 darajali koʻrsatkichni qayd etganligi haqida xabar bergan edik.
