Misrdagi islom olamining eng nufuzli ilmiy-diniy maskanlaridan biri — Al-Azhar universiteti rahbariyati Oʻzbekiston bilan ilmiy-maʼrifiy yoʻnalishlarda hamkorlikni kengaytirishga tayyor ekanini maʼlum qildi. Bosh imom shayx Ahmad at-Tayyib Oʻzbekiston delegatsiyasi bilan uchrashuvda ikki tomonlama ilmiy loyihalarni yoʻlga qoʻyish muhimligini alohida qayd etgan.
Uchrashuv davomida taʼlim va ilm-fan sohasiga oid bir qator qoʻshma tashabbuslar muhokama qilindi. Xususan, quyidagi yoʻnalishlarda hamkorlikni kuchaytirish masalalari koʻrib chiqildi:
– ulamolar va mutaxassislar oʻrtasida tajriba almashinuvi dasturlarini yoʻlga qoʻyish;
– oʻzbek talabalarining Al-Azhar universitetida tahsil olishini qoʻllab-quvvatlash;
– qoʻshma ilmiy-tadqiqot loyihalarini ishlab chiqish va amalga oshirish;
– konferensiyalar, master-klasslar hamda oʻquv seminarlarini muntazam tashkil etish.
Oʻzbekiston delegatsiyasi uchrashuvda mamlakatda diniy-maʼrifiy yoʻnalishda amalga oshirilayotgan islohotlar, ekstremizm va radikal gʻoyalarni oldini olish borasidagi chora-tadbirlar, shuningdek, yoshlar bilan ishlashda maʼrifatning oʻrni haqida maʼlumot berdi.
Shayx Ahmad at-Tayyib oʻz navbatida Oʻzbekiston bilan hamkorlikni tarixiy jihatdan muhim aloqalar sifatida eʼtirof etib, ilmiy va taʼlimiy munosabatlarni yanada mustahkamlash zarurligini taʼkidladi.
Uchrashuv yakunida tomonlar kelgusida:
– qoʻshma ilmiy loyihalarni yoʻlga qoʻyish,
– akademik almashinuv dasturlarini kengaytirish,
– talabalar va mutaxassislar uchun qoʻshimcha grantlar ajratish,
– maʼrifiy tadbirlarni muntazam oʻtkazish bo‘yicha kelishuvga erishganini maʼlum qildi.
