O‘zbekistonda maktabgacha ta’lim tashkiloti pedagogining kasbiy standarti tasdiqlandi

Vazirlar Mahkamasining 8-iyuldagi qarori bilan O‘zbekistonda maktabgacha ta’lim tashkiloti pedagogining kasbiy standarti tasdiqlandi.

Qarorda qayd etilishicha, prezidentning 2024-yil 30-sentyabrdagi farmonida maktabgacha ta’lim tashkiloti pedagogining shaxsiy fazilatlari, kasbiy bilimlari, malaka va ko‘nikmalariga qo‘yiladigan asosiy talablarni belgilaydigan kasbiy standartlarni tasdiqlash belgilangandi.

Kasbiy standartda quyidagilar nazarda tutiladi:

– maktabgacha ta’lim tashkiloti pedagogining kasbiy standarti tamoyillari;

– maktabgacha ta’lim tashkiloti pedagogining kasbiy standartini maktabgacha ta’lim tashkiloti faoliyatida qo‘llash tartibi;

– maktabgacha ta’lim tashkiloti pedagogining ko‘rsatkichlar bo‘yicha talab qilinadigan bilim va ko‘nikmalari.

Kasbiy standart maktabgacha ta’lim tashkiloti pedagogining shaxsiy fazilatlari, kasbiy bilim, ko‘nikma va malakalariga qo‘yiladigan minimal talablarni belgilaydi.

Pedagog quyidagilar orqali bilim, ko‘nikma va malakalarga ega bo‘ladi:

– kasbiy yoki oliy ta’lim tashkilotlarining tegishli ta’lim yo‘nalishlarida o‘qish;pedagogik yoki kasbiy qayta tayyorlash kurslarida ta’lim olish;

– malaka oshirish kurslarida o‘qish;

– ustoz-shogird an’analari asosida tajribali pedagoglar ko‘magida o‘rganish;

– uzluksiz kasbiy rivojlanish tadbirlarida ishtirok etish.

Kasbiy standart bolani rivojlantirish dasturlari hamda pedagogika va psixologiya sohasida to‘plangan tajribalardan kelib chiqqan holda quyidagi asosiy tamoyillarga asoslanadi:

– bolani parvarish qilish, rivojlantirish va tarbiyalash uchun muhit yaratish;

– har bir bolaning o‘ziga xosligini, his-tuyg‘ularini va fikrlarini qabul qilish;

– ta’lim-tarbiya jarayonida bolaning rivojlanishini qo‘llab-quvvatlash;

– inklyuziv ta’limni tashkil etishdagi mas’uliyatni anglatish;

– interfaol metodlarni qo‘llash, qiziquvchanlik va izlanishlarni rag‘batlantirish;

– bolalar bilan bog‘liq o‘zari ijtimoiy munosabatlarda maktabgacha ta’lim tashkiloti, oila va mahalla hamkorligini yo‘lga qo‘yish.

Pedagog quyidagi ko‘nikmalarga ega bo‘lishi lozim:

– shaxsiy rivojlanish;

– tahliliy va tanqidiy fikrlash;

– tinglash va kuzatish;

– hamkorlik qilish;

– nizolarni va ziddiyatlarni hal qilish.