Давлат-хусусий шериклик асосида боғча очиш тартиби қандай?

Ўзбекистон Республикаси Президентининг 2018 йил 5 апрелдаги тегишли қарори билан тасдиқланган «Мактабгача таълим соҳасида давлат-хусусий шериклик тўғрисида»ги Низом талабларига кўра, хусусий шерик мулки негизида ташкил этилган, нодавлат МТТни моддий таъминлаш шаклидаги давлат-хусусий шериклик лойиҳаси хусусий шерик ташаббуси билан танлов ўтказилмай ва тақдим этилган ҳужжатларни ўрганиш асосида ташкил этилиши мумкин.

Давлат-хусусий шерикликни мазкур шаклда амалга ошириш учун қуйидаги ҳужжатлар талаб этилади:

– ариза;

 

– юридик шахс рўйхатдан ўтказилганлиги ҳақида гувоҳнома;

 

– ер участкасига бўлган ҳуқуқ давлат рўйхатидан ўтказилганлиги ҳақида гувоҳнома;

 

– биноларга бўлган ҳуқуқ давлат рўйхатидан ўтказилганлиги ҳақида гувоҳнома;

 

– ёнғин назорати органларининг мавжуд бинолар ва хоналарнинг ёнғин хавфсизлиги талабларига мослиги ҳақидаги хулосаси;

 

– санитария-эпидемиология назоратининг мавжуд бинолар ва хоналарнинг гигиена қоидалари, нормалари ва нормативларига мослиги ҳақидаги хулосаси;

 

– хусусий шерик педагогика ходимларининг олий ёки ўрта махсус педагогик маълумоти борлигини тасдиқловчи ҳужжатлар.

Хусусий шерикнинг лойиҳани амалга ошириш тўғрисидаги аризаси давлат шериги томонидан ариза келиб тушган кундан бошлаб 15 кун ичида кўриб чиқилади.

Лойиҳани амалга ошириш мақсадга мувофиқлиги тўғрисида қарор қабул қилинган тақдирда, давлат шериги ва хусусий шерик ўртасида етти кун ичида битим тузилади.

Аввалроқ, энди боғча тарбиячилари ҳам касбий сертификатлаш жараёнларига жалб этилиши ҳақида хабар берган эдик.