Жиззахда хусусий боғча тарбияланувчиси бассейнга чўкиб вафот этди. Ҳолат юзасидан жиноят иши қўзғатилди

Ижтимоий тармоқларда Жиззахда 1,5 ёшли қизалоқ хусусий боғчада бассейнга чўкиб вафот этганлиги ҳақида хабар тарқалди.

Маълум қилинишича, ҳолат Мирзачўл туманидаги «Меҳрли юлдуз» нодавлат мактабгача таълим муассасасида содир бўлган: тушлик пайти болаларни овқатлантиришга олиб чиқишда қизалоқни йўқотиб қўйган тарбиячи бироз ўтиб уни бассейндан чўккан ҳолатда топган.

Марҳуманинг онаси Kun.uz‘га йўллаган мурожаатида ҳолат 24 октябрь куни тумандаги «Меҳрли юлдуз» боғчасида содир бўлган.

«Қизим Фериде Ҳамроқулова 2024 йил 5 май куни туғилган. У бассейнга чўкиб ўлди. Ҳозирча бирор ҳуқуқни муҳофаза қилувчи орган ходимлари биздан хабар олмади, сўраб-суриштирмади. Ҳолат бўйича ҳеч ким изоҳ бермаяпти», дейди у.

Нодавлат мактабгача таълим муассасаси тарбиячиси ҳолатни тасдиқлаган.

«Бу овқатланишга чиқаётган вақтимизда содир бўлди. Соат 12:00 дан кейин тушликка чиқамиз. Ўшанда ёнимда эди. Бошқа болаларнинг оёқ кийимини кийдиргунимча қаергадир кетиб қолибди. Ошхонага кетган деб ўйлаб, қолган болаларни аста-аста ошхонага олиб бордим. Феридени бассейндан топдим, шундай сувнинг устида турган экан, кўтариб олдим. Биринчи ёрдам кўрсатдик: кўкрагини босдик, тарбиячимиз келиб, қўлини оғзига тиқиб кўрди, кейин раҳбаримизнинг ўғли билан шифохонага олиб бордик. Гуруҳимда 26 нафар бола бор, бир ўзим қарайман. Ўша куни 23 нафари келганди», деган тарбиячи.

Қизалоқ ушбу боғчага 3 октябрдан кела бошлаган.

Болалар омбудсмани Сурайё Раҳмонованинг Kuz.uz’га маълум қилишича, ҳолат юзасидан 27 октябрь куни Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.