Жиззахда боғча болаларининг заҳарланиш ҳолати — вазирлик изоҳ берди

Жиззахда ҳам 37 нафар боғча болалари овқатдан заҳарлангани аниқланганлиги ҳақида хабар берган эдик.

Ушбу ҳолат юзасидан Соғлиқни сақлаш вазирлиги расмий баёнот берди.

2025 йил 9-октабр куни Жиззах вилояти Фориш туманидаги бир нечта мактабгача таълим ташкилотларининг айрим тарбияланувчиларида энгил нохушлик, ҳароратнинг кўтарилиши, кўнгил айниши ва қисқа муддатли овқат ҳазм қилиш бузилиши белгилари кузатилган.

Уларга ўз вақтида зарур тиббий ёрдам кўрсатилган. Ҳозирги пайтда барча болаларнинг аҳволи барқарор, соғлиғига хавф йўқ. Фақат 2 нафар бола профилактика мақсадида шифокорлар кузатувида қолмоқда.

Дастлабки маълумотларга кўра, нохушлик ҳолати озиқ-овқат омиллари билан боғлиқ бўлиши эҳтимол қилинмоқда. Аниқ сабаб лаборатория таҳлиллари натижаларига кўра белгиланади.

Санитария-эпидемиологик осойишталик хизмати мутахассислари томонидан озиқ-овқат маҳсулотлари ва сувдан намуналар олинган, тадқиқотлар олиб борилмоқда, — дейилади баёнотда.

Шунингдек, болалар саломатлиги ва овқатланиш хавфсизлигига оид ҳолат юзасидан Болалар омбудсмани ҳам Жиззах вилояти Фориш туманидаги 1-, 3-, 5- ва 7-сонли давлат мактабгача таълим муассасаларида оммавий заҳарланиш ҳолати бўйича жойига чиққан тарзда мониторинг ўрганиш ишларини олиб бораётганини билдирган.

Ўрганиш натижалари бўйича қўшимча маълумот берилиши кутилмоқда.