Қонунчиликка кўра, таълим муассасасининг лицензияси фақат суд қарори асосида бекор қилиниши мумкин. Бироқ сўнгги ойлар давомида амалиётда бундан фарқли вазиятлар кузатилмоқда.
Масалан, жорий йилнинг май ойида бир хусусий олий таълим муассасаси филиал очиш учун лицензия олган. Орадан бир кун ўтиб, муассаса раҳбарияти ариза ёзишга мажбур қилинган ва лицензия қайтариб олинган. Расмий сабаб сифатида эса «техник носозлик» кўрсатилган.
Август ойининг бошида яна икки хусусий ОТМга янги йўналиш ва таълим шакли учун лицензия берилган, бироқ эртасига у ҳам қайтариб олинган. Баҳона — яна «техник носозлик».
Яқинда эса беш нафар хусусий ОТМга филиал ва таълим йўналишлари бўйича берилган лицензия ҳам худди шу сабаб билан бекор қилингани маълум қилинди.
Бироқ лицензия берувчи жараённи назорат қилувчи Адлия вазирлиги бундай иддаоларни рад этди. Вазирликнинг расмий баёнотида ҳеч қандай техник носозлик қайд этилмагани ва рухсатсиз амал бажарилмагани таъкидланди.
