Сўнгги ҳафталарда абитуриентлар ва ўқитувчилар томонидан таҳририятимизга бир хил мазмундаги мурожаатлар келиб тушмоқда. Билдирилишича, турли гуруҳларда номаълум шахслар ўзларини Билим ва малакаларни баҳолаш агентлиги ходими деб таништириб, абитуриент ва талабаларга чет тилларидан миллий сертификат, педагогларга эса ҳеч қандай аттестация синовларида қатнашмасдан тоифа сертификатини олиб беришни ваъда қилган.
Ушбу фирибгарлар асосан таълимга оид телеграм каналларининг гуруҳларида бир хил мазмун ва шаклда «Ассалому алайкум миллий сеэртификат ва аттестация топширмоқчи бўлганлар ва топшириб ўта олмаганлар бизга ёзинглар, тўғирлаб берамиз» деб хабар ёзиб, одамларни алдаб келган. Шунингдек, улар ўзларини агентликнинг расмий ходими деб таништирган. Чет тилларидан миллий сертификатларни 300$ дан 500$ гача бўлган миқдорда олиб беришни ваъда қилган.
Ўқитувчиларга эса ўзини Мактабгача ва мактаб таълими вазирлигининг мутахассисларидан деб таништириб, аттестациядан ўтолмаган педагогларга «ишончли ва кафолатланган» тоифа сертификатини олиб беришни айтган.
Бизга мурожаат қилган ўқитувчининг сўзларига кўра, фирибгарнинг эълонини таълимга оид телеграм гуруҳлардан бирида кўрган ва мурожаат қилган. У педагогга олий тоифани олиб бериш учун 500$ миқдорда пул сўраган ва сертификатни олиш учун олдиндан 50% тўловни юборишни айтган. Педагог унда ҳозирдан унча пул йўқлигини айтиб, 1,5 млн сўм миқдорда пул ўтказиб берган. Пул ўтиши билан фирибгар ўқитувчини телеграмда блоклаган ва ёзишмаларни ўчириб юборган.
Яна бошқа бир мурожаатчи эса, фарзандига миллий сертификат олиб бериш учун фирибгарнинг «тузоғига» тушган. Аёлнинг айтишича, сертификат агентлик базасида кўриниши учун олдиндан тўловни ўтказиш шартлигини айтган. Аёл эса 500 минг сўм ўтказганидан сўнг, телеграмда блокка тушган ва барча ёзишмалар ўчириб юборилган.
«Ўзини Билимни баҳолаш агентлиги ходими деб таништириб, одамларни алдаб пулини олиб, кейин блоклаб қўяяпти», — дейди мурожаатчилардан бири.
Ушбу ҳолатни ўрганиш мақсадида, ушбу фирибгар билан гўёки чет тилидан Б2 сертификат кераклиги ва қанча муддатда тайёр бўлиши ҳақида гаплашиб кўрдик. Ушбу шахс сертификат ҳақиқий эканлигини, 100 фоиз ишончлигини айтиб ўтди. Бизнинг «ҳозир миллий сертификат имтиҳонлари бўлмаяпти, сиз сертификатни қандай олиб берасиз» деган саволимизга қуйидагича жавоб бериб, саволга жавоб беришдан қочди:
«Ушбу сертификат Билим ва малакаларни баҳолаш агентлиги томонидан бериладиган ҳақиқий сертификат. Сиз пулни юборинг ва сертификатни қўлингизга олгач, ўзингиз текшириб олаверасиз. Ишончингиз комил бўлсин, бизда ҳаммаси ҳаққоний», — дейди ўзини агентликнинг расмий ходими деб таништирган Абдуллаев.
Бундан ташқари фирибгар махсус телеграм канал очиб, унда «натижаларини» қўйиб борган. Унинг айтишича, маълумотлар махфий сақланади, аммо телеграм канали орқали «олиб берган сертификатлари»ни кўриш мумкин. Ушбу телеграм каналга жойланган барча сертификатлардаги ўқувчилар расмининг устига турли стикерлар қўйилган ва беркитилган. Фирибгар ушбу натижаларнинг барчасини ўзи олиб берганини, натижага 100 фоиз кафолат беришини айтган.
Эслатма ўрнида шуни айтиш жоизки, таълимг соҳасидаги барча турдаги сертификат ва аттестация ҳужжатлари қонунчиликда белгиланган тартибда имтиҳон ўтказилиб, талабгорнинг олган натижасидан келиб чиқиб берилади. Ноқонуний йўл билан бундай ҳужжатларни «тезлаштириб» олиб беришни ваъда қилаётган шахслар қонунни бузаётган ва фирибгарлик қилаётган ҳисобланади. Фуқароларга бундай таклифларга ишонмаслик, шубҳали ҳолатларда эса тегишли органларга хабар бериш тавсия этилади.
