Жорий йилнинг 1 июль ҳолатига кўра, пенсия олувчилар сони 4 202,5 минг нафарни ташкил этган.
Шундан, ёшга доир пенсия – 3 477,9 минг нафар;
Ногиронлик пенсияси – 475,5 минг нафар;
Боқувчисини йўқотганлик пенсияси – 249,1 нафар.
Бу жами аҳолининг 11 фоизини қамраб олган.
Пенционерлар сони 2025 йил 1 июль ҳолатига ўтган йилнинг шу даврига нисбатан 98,1 мингта (ёки 2,4 фоизга) ошган.
«Фуқароларнинг давлат пенсия таъминоти тўғрисида»ги Ўзбекистон Республикаси Қонуни 1993 йил 3 сентябрда қабул қилинган бўлиб, фуқаролар қариганда – ёшга доир, меҳнат қобилиятини тўлиқ ёки қисман йўқотганда – ногиронлик, ҳамда боқувчи вафот этганда – боқувчисини йўқотганлик пенсиялари билан таъминлаш кўзда тутилган.
Ёшга доир пенсия олиш учун эркаклар 60 ёшга тўлганида ва иш стажи камида 25 йил бўлган тақдирда, аёллар 55 ёшга тўлганида ва иш стажи камида 20 йил бўлган тақдирда эга бўлади.
Бунда, камида 7 йил иш стажи мавжуд бўлган тақдирда, бор стажга мутаносиб миқдорда тўлиқсиз ёшга доир пенсия тайинланади.
Ногиронлик пенсияси қонунчиликда белгиланган тартибда I ва II гуруҳ ногиронлиги белгиланган шахсларга тайинланади. Бунда, ногиронлик белгиланган фактда қуйидагича иш стажига мавжудлиги талаб этилади:
23 ёшгача – 2 йил;
23 ёшдан 26 ёшгача – 3 йил;
26 ёшдан 31 ёшгача – 5 йил;
31 ёшдан 36 ёшгача – 7 йил;
36 ёшдан 41 ёшгача – 9 йил;
41 ёшдан 46 ёшгача – 11 йил;
46 ёшдан 51 ёшгача – 14 йил;
51 ёшдан 56 ёшгача – 17 йил;
56 ёш ва ундан ошганда – 20 йил.
Боқувчисини йўқотганлик пенсияси вафот этган боқувчининг қарамоғида бўлган меҳнатга қобилиятсиз оила аъзоларига тайинланади. Бунда, вафот этган фуқаронинг фарзандларига 18 ёшгача (агар ўқиса 23 ёшгача) пенсия тўланади.
Маълумот учун, 2024 йилда жами 306 ооо та пенсия янги тайинланганди.
Шундан, ёшга доир пенсия – 242,7 минг нафар;
Ногиронлик пенсияси – 44,5 минг нафар;
Боқувчисини йўқотганлик пенсияси – 18,8 нафар.
