Олий таълим, фан ва инновациялар вазирлиги тест синовларига турли сабабларга кўра қатнаша олмаган абитуриентлар ва уларнинг яқинларининг мурожаатларига жавоб берди.
Вазирлик маълумотига кўра, тест куни имтиҳон вақтига кечиккан, шахсини тасдиқловчи ҳужжати ёки абитуриент рухсатномаси бўлмаган шахслар имтиҳон ўтказиладиган бинога киритилмайди.
Шунингдек, абитуриентга берилган рухсатномада кўрсатилган сана ва вақт қатъий ҳисобланади. Яъни, имтиҳонни бошқа кунга кўчириш ёки бошқа вақтда топширишга рухсат берилмайди.
«Шу боисдан, абитуриентлардан тест синовларига шахсни тасдиқловчи ҳужжат ва рухсатнома билан, рухсатномада кўрсатилган вақтдан кечикмасдан келишлари талаб этилади», – дейилади вазирлик муносабатида.
