Россияда ўтказилган тадқиқот натижасида сунъий интеллект (SI) ўқитувчиси билан машғулотлар ўтказган талабалар кўпроқ илмий терминларни эслаб қолганлари маълум бўлган.
Сколково Менежмент Мактаби ва МФТИ биргаликдаги бакалавриат дастури талабалари «Инсон хулқ-атвори биологияси» курсини тўлиқ SI-профессор – «Роберт» раҳбарлигида ўрганган. Роберт Сколково Менежмент Мактаби Сунъий интеллект лабораторияси ва Тюмен давлат университети томонидан яратилган.
Эксперимент натижалари «Известий» нашрида эълон қилинган.
Унда SI-ўқитувчи ва одатий инсон ўқитувчиси самарадорлигини солиштириш учун икки гуруҳ бир хил мазмундаги интенсив курсни олган. Ҳар бир гуруҳда 42 нафар биринчи курс талабаси қатнашган, курслар 6 кун давомида ҳар куни 7 соат бўлиб ўтган. Талабалар илгари биология бўйича давлат имтиҳонини топширмаган ва SI билан фақат амалий тажрибага эга бўлишган.
Анъанавий форматда курс одатий ўқитувчи маърузалари ва юзма-юз семинарларни ўз ичига олган. SI-профессор бошчилигидаги гуруҳда талабалар унга индивидуал ва гуруҳ шаклидаги турли усуллар орқали мурожаат қилишган.
Натижаларга кўра, SI-ўқитувчи билан ўрганган талабалар жавобларида кўпроқ мавзулар қамраб олинган, шунингдек, илмий терминларни аниқроқ ва батафсилроқ ишлатишган. Улар курснинг асосий ғояларини янада тўлиқ тушунишганлиги аниқланган.
Экспериментда Тюмен давлат университети томонидан ишлаб чиқилган «SI-persona» технологияси қўлланилган. Бу технология мавжуд нейрон тармоқлари асосида яратилган бўлиб, таълим жараёнига мўлжалланган махсус функцияларга эга ҳисобланади.
