Хабарингиз бор, 2025/2026-ўқув йилида иккинчи ва ундан кейинги таълим (иккинчи мутахассислик) учун талабгорлар жорий йилнинг 10 июль кунидан 10 август кунига қадар онлайн рўйхатдан ўтишлари керак эди.
Аммо ариза топшириш жараёнлари ҳали бошланмади. Сабабини билиш учун Олий таълим, фан ва инновациялар вазирлиги матбуот котиби билан боғланганимизда бу ҳали номаълум эканлигини ва ҳали тасдиқланиши кутилаётганини таъкидлади.
Эслатиб ўтамиз, рўйхатдан ўтказиш Олий таълим, фан ва инновациялар вазирлигининг Ягона таълим хизматлари портали my.edu.uz орқали онлайн шаклда амалга оширилади.
Бунда номзодлар платформада:
ўзининг паспорт маълумотлари, ЖШШИР маълумоти ҳақида ахборотларни киритади;
диплом ва унинг иловасининг электрон нусхасини юклайди;
ҳамда ўқиш истагини билдирган олий таълим муассасаси ва таълим йўналишини танлайдилар.
Иккинчи ва ундан кейинги олий маълумот бўйича ўқитиш тўлов-контракт асосида амалга оширилади.
Маълумот учун, иккинчи ва ундан кейинги олий таълим бўйича қабул параметрлари олий таълим муассасасининг илмий-педагогик салоҳияти ва моддий-техник базаси ҳисобга олинган ҳолда олий таълим муассасаси кенгаши томонидан белгиланади.
