Жиззах вилояти Шароф Рашидов тумани ҳокими Маҳмуд Холбўтаев давлат хавфсизлик хизмати ходимлари томонидан пора олаётган вақтда қўлга олинди. Бу ҳақда Давлат хавфсизлик хизмати матбуот хизмати хабар берди.
Дастлабки маълумотларга кўра, ҳокимликнинг бош мутахассиси тумандаги қурилиш компанияси МЧЖ раҳбаридан кўп қаватли уй қуриш учун ер ажратиш эвазига 30 минг АҚШ доллари талаб қилган. Жорий йилнинг 5 июль куни у ушбу маблағнинг 10 минг долларини олиб, туман ҳокимига берган. 8 июль куни эса қолган 20 минг долларни тадбиркордан олган.
Қайд этилишича, тадбиркорга Шароф Рашидов тумани «Токчилик» МФЙ ҳудудидаги умумий ўрта таълим мактаб биносини қуриш учун ажратилган 1,7 гектар ерда 8 та кўп қаватли уй қуришга рухсат берувчи ҳужжатлар тақдим этилган.
Бош мутахассис туман ҳокимига ҳокимият биноси олдида 10 минг долларни бераётган пайтда, ДХХ ходимлари уларнинг ноқонуний ҳаракатларига чек қўйган.
Ҳозирда Шароф Рашидов тумани ҳокими Маҳмуд Холбўтаев депутатлик дахлсизлик ҳуқуқидан маҳрум этилиб, унга нисбатан Жиноят кодексининг 210-моддаси билан, бош мутахассисга эса 168 ва 211-моддалари билан жиноят иши қўзғатилган.
Маълумот учун, Маҳмуд Парсаматович Холбўтаев илгари Мирзачўл тумани ҳокими, Жиззах вилояти ҳокимининг ўринбосари бўлиб ишлаган, 2019 йилдан 26 октябридан буён Шароф Рашидов тумани ҳокими лавозимида фаолият юритган. У, шунингдек, Ўзбекистон Республикаси Мустақиллигининг 33 йиллиги муносабати билан «Дўстлик» ордени билан тақдирланган.
