Хитойнинг Футсзян вилоятидан бўлган Дин Юанчжао тўртта нуфузли университетни, жумладан Оксфордни ҳам тамомлаган бўлишига қарамай, ҳозирда у курьер бўлиб ишламоқда.
39 ёшли эркак Синхуа университети ўқишга қабул қилинган. У ерда кимё бўйича бакалавр даражасини олгач, у бошқа машҳур олий ўқув юрти — Пекин университетида энергия муҳандислиги бўйича магистратурани тамомлаган.
Кейинчалик у Сингапурдаги энг юқори даражадаги университетлардан бири — Нанянг Технология Университетида биология фанидан докторлик (ПҳД) даражасини олган. Бундан ташқари, Британиядаги Оксфорд университетида биологик хилма-хиллик бўйича яна бир магистр даражасини қўлга киритган.
Бироқ мутахассислиги бўйича муносиб иш топа олмаган. Дин Юанчжаонинг айтишича, у меҳнат бозорида қийинчиликларни бошдан кечирган — кўплаб резюмелар юборган, ўндан ортиқ суҳбатлардан ўтган, аммо нуфузли лавозимга кира олмаган.
У орзу қилган соҳасида иш топа олмагач курьерлик йўлини танлаган.
Сингапурда озиқ-овқат етказиб бериш платформасида рўйхатдан ўтган. У ерда кунига 10 соатдан ишлаган ва ҳафтасига тахминан 700 цингапур доллари (қарийб 550 АҚШ доллари) ишлаб топган. Кейинчалик у Хитойга қайтган ва ҳозирда Пекинда курьер бўлиб ишламоқда.
У ўзининг ижтимоий тармоқлардаги саҳифаларида бу ишнинг соғлиқ учун фойдалари ҳақида контент жойлаб боради ва курьерлар ҳар доим жисмоний фаолликда бўлиши кераклигини таъкидлайди.
«Мен бу даромад билан оиламни боқишим мумкин. Агар сиз астойдил ишласангиз, муносиб ҳаёт кечиришга етарли пул топасиз. Бу ёмон иш эмас», — дейди у.
У айтишича, етказиб бериш хизматлари ўрнига хусусий репетиторлик билан шуғулланиши мумкин эди, бироқ «мижоз излашга жуда уялчан» бўлгани сабабли бу фикрдан воз кечган.
Шунингдек, у яқинда бўлиб ўтган гаокао имтиҳонини топширган абитуриентларни қўллаб-қувватлаган видеоси орқали интернетда катта эътибор қозонган.
«Агар сиз имтиҳонда яхши натижаларга эриша олмаган бўлсангиз, тушкунликка тушманг. Агар яхши топширган бўлсангиз, ёдингизда тутинг — одамларнинг касби инсоннинг қадр-қимматини белгиламайди», — деб маслаҳат берган у.
