Жанубий Кореянинг собиқ биринчи хоними Ким Кеон Хи магистрлик даражаси Sookmyung Women’s University томонидан бекор қилингач, у таълим олган Kookmin University ҳам унинг докторлик даражасини бекор қилиш масаласини кўриб чиқмоқда.
Жорий йилнинг 24-июнь куни эълон қилинган баёнотда Kookmin University собиқ биринчи хоним Ким Кеон Хининг ушбу университетда олган докторлик даражасининг ҳақиқийлигини текшириш бўйича зарур чораларни кўраётгани маълум қилинди.
Ким Кеон Хи 2008-йилда Kookmin University нинг муҳандислик дизайни мактабида докторлик даражасини олган. Олдинроқ, 1999-йилда эса Sookmyung Women’s University нинг олий таълим мактабидан магистрлик даражасини олган.
Ким Кеон Хи магистрлик даражаси Sookmyung университети томонидан унинг диссертациясида плагиат аниқлангани сабабли бекор қилинган. Шундан сўнг Kookmin университети ҳам тегишли чораларни кўришга киришган.
«Ким хонимнинг магистрлик даражаси бекор қилинганини ҳисобга олиб, у докторлик дастурида ўқишни давом эттириш ҳуқуқига эга эканлигини ва унга докторлик даражаси берилганлиги қонуний эканлигини баҳолаш учун зарур текширувларни ўтказмоқдамиз.» — деди Kookmin университети вакили.
Жанубий Корея Олий таълим қонунларига кўра, докторлик дастурида ўқиш учун ҳақиқий магистрлик даражасига эга бўлиш шарт ҳисобланади. Ким Кеон Хи магистрлик даражасининг бекор қилиниши Kookmin университетида унинг докторлик даражасини ҳам бекор қилиш учун асос бўлади.
Ҳозирда университет тегишли ҳужжатларни, жумладан Sookmyung университетининг магистрлик даражасини бекор қилгани ҳақидаги расмий тасдиқни ҳамда Ким хонимнинг бошқа ҳужжатлар ва ишларига кириш учун розилигини йиғмоқда.
«Ушбу масалани муҳандислик ва технологиялар мактабининг кенгашига расмий тарзда тақдим этамиз. Сўнгра Kookmin университетининг юқори кенгашига юбориб, якуний қарор қабул қиламиз. Вазият жиддийлигини инобатга олиб, жараённи тез ва аниқ олиб боришга барча имкониятларни ишга соламиз,» — деди университет вакили.
