71 ёшли Селма Шаҳин Кутаҳё Думлупинар университетининг гўзаллик санъати касб-ҳунар коллежида график дизайн бўйича икки йиллик ўқишни муваффақиятли тугатди. Бу ҳақида Jarayon.uz хабар бермоқда.
Ёшлигида отасининг моддий имкониятлари сабабли ўқишни тўхтатган Шаҳин хоним орадан йиллар ўтиб орзусига қайтди. У аввал мактаб ва лицейни сиртқи шаклда тугатди, кейин эса олий таълим имтиҳонидан етарли балл тўплаб, коллежга ўқишга кирди.
Унинг айтишича, расм ва санъатга бўлган қизиқиш уни график дизайн йўналишини танлашга ундаган.
«Бу мен учун катта орзу эди. Ёшим катта бўлишига қарамай, ўқишдан воз кечмадим. Атрофимдагилар ЪБу ёшда нима қиласан ўқиб дейишди, лекин мен эшитмадим,» — деди Селма Шаҳин.
Ўқиш давомида у компьютер дастурлари бўйича кўмак олганини, график дастурларни ўрганганини, ёш курсдошларидан илиқ муносабат ва ёрдам кўрганини айтди.
«Ўқувчилар билан яхши чиқишдик. Ҳар куни ўқишга боришни интиқлик билан кутардим. Мени ҳеч ким четда қолдирмади. Улар менга айниқса компьютерда жуда кўп ёрдам беришди.»
Коллеж ўқитувчиси Меҳтап Очакўғлининг айтишича, онахон билим олишга жуда иштиёқманд бўлган ва ёш талабалар ичида камёб бўлган қатъиятни кўрсатган.
Университет ректори, профессор Сулейман Қизилтопроқ эса унга «фахрий ёрлиқ» топшириб, билим олишда ёш тўсиқ эмаслигини таъкидлади.
Синфдошлари ҳам Селма Шаҳинга илиқ муносабат билдирган.
«Селма опа билим олишнинг ёши йўқлигини исботлади. Биз ундан ҳам ўрнак олдик — дейди талабалардан бири Булент Иброҳим Қораев»
