Мактабгача ва мактаб таълими вазирининг 2025 йил 8 апрелдаги «Касб-ҳунарга ўқитиш жорий этилган умумий ўрта таълим муассасалари битирувчилари учун касбий таълим фанидан якуний имтиҳонни ташкил этиш ва ўтказиш тўғрисида»ги 117-сонли буйруғи қабул қилинди.
Мазкур буйруққа асосан:
– касбий таълим фанидан якуний имтиҳон ташкил этиладиган умумий ўрта таълим муассасалари рўйхати 1-иловага мувофиқ;
– умумий ўрта таълим муассасаларида якуний имтиҳон олинадиган касб-ҳунарлар рўйхати 2-иловага мувофиқ;
– касб-ҳунар турлари бўйича якуний имтиҳон ўтказиш тартиби 3-иловага мувофиқ тасдиқланган.
2023-2024-ўқув йилидан касб-ҳунарга ўқитиш жорий этилган умумий ўрта таълим муассасаларида 2024-2025-ўқув йилида 11-синфлар учун касбий таълим фанидан якуний имтиҳон жорий йилнинг 17-20 июнь кунлари амалий имтиҳон шаклида ўтказилади.
Якуний имтиҳон давомида ўқувчиларни баҳолашда уларнинг ўрганган касб-ҳунари бўйича эгаллаган билими ва компетенцияси баҳоланади ҳамда имтиҳонни муваффақиятли топширган битирувчиларга электрон сертификат берилади.
