Ўзбекистон инглиз тилини билиш даражаси энг паст бўлган мамлакатлар қаторида қолмоқда. Айниқса, 18-20 ёшли ёшлар орасида суст натижалар кузатилган бўлса, 21-25 ёшли талабаларнинг тил билиш даражаси сезиларли даражада яхшилангани қайд этилган.
EF Education First компанияси томонидан ўтказилган EF English Proficiency Index 2024 global тадқиқотига кўра, бу йил Ўзбекистон ўтган йилга нисбатан бешта поғона пастга тушиб, 98-ўринни эгаллади. Мамлакат бўйича ўртача балл 442 дан 439 гача (максимал кўрсаткич – 700) пасайди, бу CEFR шкаласи бўйича B1 даражасига тўғри келади.
Мамлакатнинг йирик шаҳарларида энг яхши натижалар Андижон (461 балл), Тошкент (457 балл), Фарғона (456 балл), Бухоро (436 балл) ва Самарқандда (431 балл) қайд этилди. Вилоятлар орасида Тошкент вилояти (463), Фарғона (458), Андижон (455), Навоий (446) ва Бухоро (438) етакчилик қилмоқда. Энг паст кўрсаткичлар Жиззах (384), Қашқадарё (404) ва Хоразм (405) вилоятларида кузатилган.
EF Education First, шунингдек, инглиз тилини билишнинг глобал даражаси пасайганини қайд этди: мамлакатларнинг 60 фоизида кўрсаткичлар ўтган йилга нисбатан паст бўлди. 2024 йилги рейтингнинг энг юқори поғоналарини Нидерландия, Норвегия ва Сингапур эгаллади.
Тадқиқот муаллифларининг фикрича, кўплаб мамлакатларда инглиз тилини оммавий ўзлаштиришга қизиқиш сусайган, бу эса кўрсаткичларнинг пасайишига олиб келган.
Маълумот ўрнида, EF Education First – 1965 йилда Швецияда асос солинган халқаро таълим компанияси. Унинг фаолиятининг асосий йўналиши – чет тилини ўқитишнинг академик дастурларидир. Рейтинг уларнинг тадқиқот маркази томонидан ишлаб чиқилган ва турли мамлакатлардаги катта ёшдаги фуқароларнинг инглиз тили даражасини баҳолаш имконини берувчи бепул EF CET тести натижалари асосида тузилади. Ушбу тест ёрдамида компания 114 та мамлакатда 2 миллиондан ортиқ одамни синовдан ўтказган ҳамда ушбу маълумотлар асосида турли мамлакатлар орасидаги инглиз тилини билиш даражасини кўрсатадиган глобал рейтинг тузилади.
