Bugun, 14-iyuldan 2026/2027-o‘quv yili uchun davlat oliy va kasbiy ta’lim muassasalariga kirish test sinovlari boshlandi. Talimxabarlari.uz muxbiri test sinovlari o’tkazilayotgan hududda bo‘lib, abituriyentlarning ilk imtihon kunidan fotolavhalarni tayyorladi.
Bilim va malakalarni baholash agentligi ma’lumotiga ko‘ra, test sinovlari 14–23-iyul kunlari davomida respublika bo‘ylab 64 ta yopiq turdagi katta sig‘imli binoda o‘tkaziladi.
Quyida kirish test sinovlarining ilk kunidan Talimxabarlari.uz muxbiri olgan fotolavhalarni tomosha qilishingiz mumkin.
Imtihonlar har kuni ikki smenada tashkil etiladi. Birinchi smena soat 08:00 da, ikkinchi smena esa 15:00 da boshlanadi.
Abituriyentlar belgilangan vaqtdan kamida bir yarim soat oldin test o’tkaziladigan hududga kelib, tekshiruvlardan o’tgan holda o‘z joylarini egallashi lozim.
Joriy yilda jami 677 907 nafar abituriyent onlayn ro‘yxatdan o‘tgan. Shundan 365 196 nafari xotin-qizlar, 312 711 nafari erkaklarni tashkil etadi.
Shuningdek, 12 997 nafar abituriyent barcha fanlardan milliy yoki xalqaro sertifikatga ega bo‘lgani sababli test sinovlaridan ozod etilib, bevosita tanlov bosqichiga o‘tkazilgan.
Test sinovlari to‘liq videokuzatuv ostida tashkil etilgan bo‘lib, jarayonlarni test2026.uz sayti orqali onlayn kuzatish mumkin.
Eslatib o‘tamiz, test sinovida ishtirok etish uchun pasport (ID-karta) va ‘‘Abituriyent ruxsatnomasi’’ bo‘lishi shart. Hali ruxsatnomasini yuklab olmagan abituriyentlar uni @ruxsatnoma_uzbmb_bot Telegram boti orqali tez va qulay yuklab olishlari mumkin.
