Олий таълим, фан ва инновациялар вазирлиги ҳамда Мактабгача ва мактаб таълими вазирлигининг 2025 йил 6 октябрдаги 3515-1-сонли қарорига кўра хорижий тиллар ва умумтаълим фанларини билиш даражасини белгилаб берувчи миллий ва халқаро тан олинган сертификатлар рўйхатига ўзгартиш ва қўшимчалар киритилди.
Унга кўра:
➖ Таълим соҳасида хизмат кўрсатувчи ваколатли халқаро ташкилотларнинг расмий рўйхатидан ўтган тест марказларига (authorized test centers) ташриф буюрмасдан, ташкилот вакилларининг бевосита назорати остида имтиҳонни топширмасдан, масофадан олинган сертификатлар (Remote, Home Edition ва бошқа турдаги сертификатлар) учун устамалар қўлланилмайди ҳамда ушбу сертификатлар умумий ўрта, ўрта махсус, профессионал, олий ва олий таълимдан кейинги таълимга киришда ва ишга қабул қилишда тан олинмайди.
➖ Умумий ўрта, ўрта махсус, профессионал, олий ва олий таълимдан кейинги таълимга киришда, ишга қабул қилишда ҳамда устамалар белгилашда амал қилиш муддати берилмаган сертификатлар ушбу сертификат олинган кундан бошлаб уч йилдан кўп бўлмаган муддатга амал қилади.
➖ Мазкур қарор кучга киргунга қадар олинган сертификатлар уларнинг олинган кунидан бошлаб амал қилиш муддати тугагунча (муддати берилмаган сертификатлар учун сертификат олинган кундан бошлаб уч йилдан кўп бўлмаган вақт мобайнида) қадар бўлган муддатда ўқишга ва ишга қабул қилишда, шунингдек устамалар тўлашда инобатга олинади.
➖ 2025 йил 3 октябр санасига қадар олинган Test of English as a Foreign Language (TOEFL iTP) ва Microsoft Certified Educator (MCE) халқаро сертификатлари учун уларнинг амал қилиш муддати тугагунча (муддати берилмаган сертификатлар учун сертификат олинган кундан бошлаб уч йилдан кўп бўлмаган вақт мобайнида) умумий ўрта, ўрта махсус, профессионал, олий ва олий таълимдан кейинги таълимга ўқишга кириш, ишга қабул қилиш ҳамда устамалар белгилаш бўйича имтиёзлар қўлланилади. Бунда, 2025 йил 3 октябр санасидан кейин олинган юқоридаги сертификатлар учун ўқишга кириш, ишга қабул қилиш ҳамда устамалар белгилаш бўйича имтиёзлар қўлланилмайди.
