Қозоғистонлик 18 ёшли Арлан Рахметжанов мактабни ташлаб, «Y Combinator» дастурида қатнашиб, ўзининг сунъий интеллект асосидаги стартапи Nozomio учун 6,2 млн АҚШ доллари миқдорида инвестиция жалб қилган.
Арлан дастурлашга қизиқишни жуда эрта бошлаган. У дастлаб Қозоғистондаги Америка мактабида мустақил равишда код ёзишни ўрганиб, 15 ёшида эса илк компаниясини яратишга киришган. 2023 йил охирида у код ёзувчи агентлар учун маҳсулот лабораторияси — Nozomio ни ишга тушириб, биринчи воситаси Niа ни ишлаб чиққан.
Y Combinator (YC) — бу стартаплар учун тезлаштириш дастури. У ерда янги ғоя ёки кичик компанияга:
– пул (бошланғич инвестиция);
– менторлар (тажрибали мутахассислар);
– тажриба ва алоқалар (инвесторлар, бошқа асосчилар билан) берилади.
3 ойлик дастурдан сўнг стартаплар катта инвесторларга ўз лойиҳаларини тақдим этади. Шу орқали Airbnb, Dropbox, Reddit каби йирик компаниялар ҳам бир вақтлар YC орқали бошланган.
Арлан Рахметжанов Product Hunt да ўз маҳсулотини тақдим этгач, инвесторларнинг эътиборини тортган. Ҳатто мактаб дарсларида инвестор қўнғироғи учун аудиториядан чиқариб юборилган бўлсада, бу жараён унга илк пре-сеэд инвестиция олиш имконини берган.
2025 йил апрелида у Nozomiо учун дастлаб 1 млн АҚШ долларидан кам маблағ йиғган. YC Demo Day дан олдин эса умумий ҳисобда 6,2 млн АҚШ доллари миқдорида сармоя жалб қилган. Seed raund CRV, BoxGroup, LocalGlobe ва Y Combinator бошчилигида ўтказилди. Шунингдек, Паул Граҳам ва Spotify CTO си каби таниқли инвесторлар ҳам қўшилган.
Ҳозирда у АҚШда О-1 визаси асосида фаолият юритмоқда. У компанияни ҳозирча ёлғиз бошқармоқда, бироқ яқин орада биринчи ходимини ёллашни режалаштирган. Унинг асосий мақсади энг ихчам ва юқори салоҳиятли АI стартапини яратиш ҳамда ўзига ўхшаган ёш истеъдодларни жалб этишдир.
