Куни кеча Президент Шавкат Мирзиёев раислигида ўтказилган Наманган вилоятини ижтимоий-иқтисодий ривожлантириш масалаларига бағишланган йиғилишда Наманган давлат педагогика институти талабаси Бегойим Варисова ҳам иштирок этди.
У ўз фикр ва таклифларини билдирар экан, педагогика йўналиши талабалари учун «Абдулла Авлоний» стипендияси жорий этилгани учун давлат раҳбарига миннатдорлик изҳор қилди.
У шунингдек, Наманганда ҳар йили «Китобхонлар форуми»ни ташкил этиш ташаббусини илгари сурди. Мазкур форум ёшларнинг интеллектуал салоҳиятини ошириш ва китобхонлик маданиятини ривожлантиришга хизмат қилишини таъкидлади.
Президент Шавкат Мирзиёев Бегойим Варисованинг ташаббусларини қўллаб-қувватлаб, унга муддатидан аввал стипендия берилишини маълум қилди.
Эслатиб ўтамиз, аввалроқ «Педагогика йўналишидаги олий таълим ташкилотларининг талабалари учун Абдулла Авлоний номли давлат стипендиясини таъсис этиш тўғрисида»ги (10.09.2025 ПФ-162-сон) фармон қабул қилингани тўғрисида хабар берилган эди.
