Хитойнинг Ҳенан провинциясида яшовчи 18 ёшли Цзян Ченнан юрак инфекцияси сабабли комага тушган. Аммо унинг университетга қабул қилингани ҳақидаги хабар уни ҳаётга қайтарган. Бу ҳақда South China Morning Post хабар берди.
Цзян Ченнан жорий йил июнь ойида Хитойда ўтказилган миллий кириш имтиҳони — гаокаода қатнашганидан сўнг иситма ва кўкрак соҳасида босимдан шикоят қилиб, 11 июль куни шифохонага мурожаат қилган. Шифокорлар унга фулминант миокардит — юрак мушакларининг кескин яллиғланиши ташхисини қўйишган.
Бироқ ҳолати оғирлашгани боис у бошқа шифохонага кўчирилиб, комага тушган. Сўнг, у интенсив терапия бўлимида юрак-ўпка аппаратига уланган ҳолда ҳаёт учун кураш олиб борган.
18 июль куни комадаги қизининг олдига отаси келиб университетга қабул хатини ўқиб берганидан сўнг, ўзига келишни бошлаган. Эртаси куни эса у ҳушига келиб, ота-онаси билан видеоалоқа орқали мулоқотда «ОК» ишораси билан жавоб берган.
У Ҳенан провинциясидаги Ҳуангҳе Транспорт Университетига қабул қилинган. У ҳали тўлиқ тикланмаган бўлсада, шифокорлар юрак фаолияти тўлиқ тикланганини ва умумий ҳолати барқарор эканини билдиришган. Цзян Ченнан сентябрь ойида дарсларга қатнашиши кутилмоқда.
Оилавий шароитлари оғир бўлган бу қизнинг отаси 2023 йилдаги йўл-транспорт ҳодисасидан сўнг ногирон бўлиб қолган, онаси эса кўча савдоси билан шуғулланишга мажбур. Қизнинг даволаниш харажатлари ҳозирга қадар 200 минг юандан (28 минг АҚШ долларидан ортиқ) ни ташкил этган.
Мазкур воқеа Хитой ижтимоий тармоқларида катта таъсир уйғотган. Минглаб фойдаланувчилар бу ҳолатни «мўъжиза», деб атаб, унга тезроқ соғайиш ва таълим йўлида муваффақиятлар тиламоқда.
