Хабарингиз бор, 1 августдан бошлаб август декабрь ойларида ўтказиладиган педагог кадрлар аттестациясида иштирок этиш учун рўйхатдан ўтиш ва мурожаат юбориш бошланган.
Юборилган барча мурожаатлар (шу жумладан, хатолари таҳрирланиб қайтадан юборилган мурожаатлар ҳам) тоифа тестлари бошлангунга қадар (25-30 кун ичида) кўриб чиқилади ва ўрганиш натижалари тўғрисида шахсий кабинетларга хабарлар юборилади.
Талабгорлардан вақти-вақти билан Шахсий кабинетларига кириб мурожаат ҳолати билан танишиб туришларини сўралади. Шунингдек, ўз шахсий кабинетларидан Сўровномани юклаб олиб, маълумотларини текшириб кўришлари мумкин.
Шахсий кабинетингизда мурожаат ҳолати ҳақида қуйидаги ёзувлардан бири бўлади:
Янги (ёки яратилган шу ҳолатда Сиз ўзингиз аниқлаган ноаниқликларни ўзгартиришингиз, маълумотларни таҳрирлашингиз мумкин);
Жараёнда – кўриб чиқилмоқда ишчи гуруҳ томонидан ўрганиш бошланган, бу ҳолатда маълумотларга ўзгартириш киритиб бўлмайди;
Қабул қилинган – педагогга аттестацияда иштирок этишга рухсат берилган;
Рад қилинган – таҳрирлашга қайтарилган. Бу ҳолатда тўғрилаш мумкин бўлган камчиликларни тўғрилаб, тезда мурожаатингизни қайтадан юборишинга ҳаракат қилиб кўринг.
Навбатдан ташқари аттестация учун тўлиқ тўлов қилинмаса, мурожаатлар электрон базада кўринмайди ва ўрганиб чиқилмайди.
Эслатиб ўтамиз, педагогик фаолияти уч йилдан кам бўлган кадрлар мажбурий аттестацияга жалб этилмайди. Шунингдек, стажёр-ўқитувчи ишга қабул қилингандан бошлаб бир йил ичида касбий сертификатга эга бўлиши талаб этилади.
Муҳим эслатма: Мурожаатлари қабул қилинган барча педагоглар ҳам Шахсий кабинетларидан СЎРОВНОМАни юклаб олиб, ундаги маълумотлар (ФИШ, иш жойи, амалдаги тоифаси, аттестация тури, аттестациядан ўтаётган фани (лавозими)) тўғри ёки нотўғри эканлигини текшириб кўришлари шарт. Маълумотларда ноаниқлик аниқланган тақдирда зудлик вилоятдаги ИШЧИ ГУРУҲларига мурожаат қилишлари керак бўлади.
